„Oenoe abi horidoro fanowdoe”
WI ABI „horidoro fanowdoe” efoe wi wani kisi „a kontroe foe a pramisi” (Hebrewsma 10:36). Wan bijbel sabiman e tjari kon na krin taki a Griki wortoe gi „horidoro” di na apostel Paulus ben gebroiki na ini a tekst disi, son tron ben de foe taki foe „a man di wan prani man foe libi na ini moeilek situwâsi di no boen srefisrefi”.
Na ini den bergi foe Europa, leti so wan prani e gro. Ma a freimde sani de, taki den e kari en libi-foe-têgo. A no de foe taki, dati a prani disi di e gro na ini den hei bergi disi, no e libi foe têgo, ma a e horidoro foeroe jari, èn a e gi heri moi bromki ibri zomer. The New Encyclopædia Britannica e tjari kon na krin taki a nen libi-foe-têgo ben gi na a prani foe di a „man froedrage boen takroe weer èn e libi langa”. (A nen di sabidensi gi na den prani disi foe a geslakti Sempervivum wani taki so srefi „libi foe tego”.)
San e meki a prani disi di e libi langa, de so aparti, na taki a e gro na ini den moro takroe presi pe sani kan gro. A de foe feni hei na tapoe den skoinsisei foe den bergi pe winti e wai tranga, èn pe a waran wantronso kan saka kon kowroe so wan 35°C na ini soso 24 joeroe. Den roetoe foe en kan gro na ini wan olo foe wan klipston bergi pe pikinso doti de nomo. San na wan toe foe den koni di e meki taki a prani disi e horidoro na ini den sortoe moeilek omstandigheid disi?
A libi-foe-têgo prani abi deki wiwiri di e sorgoe boen taki a e hori watra. Disi e meki taki a man meki wan boen gebroiki foe ala watra di a kan kisi foe alen noso snew di e smèlter. Boiti dati, a e gro na ini bosoe di makandra e meki den prani kon tranga foe kan hori densrefi steifi na tapoe a ston gron pe den e gro. Foe di den roetoe e gro na ini den bergi-olo, meki a prani kan kisi kibri pikinso gi a weer, ala di pikinso doti de drape kande. Nanga tra wortoe, a kan gro boen foe di a e gebroiki den moeilek situwâsi di a de na ini, na a moro boen fasi.
Te wi e loekoe en na jejefasi, dan wi kan de na ini omstandigheid di kan tesi a fasi fa wi e horidoro. San sa jepi wi foe horidoro te wi e kisi tesi? Neleki a libi-foe-têgo prani, wi kan kibri a watra foe Gado Wortoe di e gi libi èn abi krosibei demakandra nanga den troe kresten foe kisi jepi nanga kibri. Ma a moro prenspari sani de taki, neleki a libi-foe-têgo prani, wi moesoe hori wisrefi tranga na wi „klipston” Jehovah, so srefi na a Wortoe foe en èn na en organisâsi. — 2 Samuèl 22:3.
Ija, a libi-foe-têgo prani na wan heri moi sani foe memre wi taki, srefi na ini wan moeilek situwâsi, wi kan horidoro efoe wi e gebroiki den sani di seti èn di de foe kisi na a moro boen fasi. Jehovah e gi wi a djaranti taki te wi e horidoro na so wan fasi, dan dati sa meki taki wi ’e kisi den pramisi leki goedoe’, èn dati sa wani taki troetroe libi foe têgo. — Hebrewsma 6:12; Mateus 25:46.