Pe den e feni a tranga foe den?

TE JOE e loekoe a kaperka na tapoe a fowtow disi finifini, dan joe sa si taki a no man gebroiki wan foe den fo frei foe en kwetikweti. Tokoe a kaperka e tan njan èn frei. Disi a no wan aparti kefal. Sma si taki kaperka e doe den aladei wroko foe den ala di den e misi 70 procent foe a tapoesei foe den frei foe den.

Na so a de toe, taki foeroe sma e sori wan krakti fasi foe denki. Ala di den abi serjoesoe problema na skin fasi noso na emotioneel sei, tokoe den no e lasi-ati. — Teki gersi 2 Korentesma 4:16.

Na apostel Paulus ensrefi ben ondrofeni bigi tesi na den zending waka foe en. Den ben krawasi en, fon en, ston en, èn ben poti en na strafoe-oso. Moro fara, a ben abi foe doe nanga wan sortoe mankeri, kande wan problema nanga en ai di ben de gi en wan „maka ini a skin” doronomo. — 2 Korentesma 12:7-9; Galasiasma 4:15.

Wan kresten owroeman di ben nen David, èn di foeroe jari ben feti nanga pisi ten foe hebi depressie, e bribi taki a tranga foe Jehovah ben de prenspari foe a kon betre. „Foeroe leisi, a ben gersi leki a go di mi ben go na fesi nanga boen foeroe moeiti, ben lasi-gowe baka”, a e tjari kon na krin. „Te mi ben kisi foe doe nanga a sortoe lasi-ati dati, dan mi ben trowe misrefi na tapoe Jehovah, èn a ben horibaka gi mi troetroe. Ten ben de, taki mi ben begi foeroe joeroe langa. Te mi ben taki nanga Jehovah, dan den firi di mi ben abi taki mi no ben abi no wan sma èn taki mi no ben warti noti, ben gowe. Mi feti den pisi ten foe bigi swakifasi, ma tangi foe Jehovah, meki tranga kon foe a swakifasi disi — srefi a tranga foe jepi trawan.”

Jehovah Gado ben tranga Paulus. Dati meki a ben kan taki: „Te mi swaki, dan mi abi makti” (2 Korentesma 12:10). Ija, Paulus swakifasi ben leri en foe froetrow na tapoe a tranga di Gado ben gi. „Gi ala sani mi abi a tranga foe en di e gi mi krakti”, na so na apostel ben taki (Filipisma 4:13). Jehovah troetroe e tranga den foetoeboi foe en.