Datra e loekoe a tori foe gebroiki tra sani leki broedoe transfusie
SO WAN 200 datra foe heri Amerkankondre ben kon makandra na Cleveland, Ohio, satra 7 oktober 1995, foe taki wan tori di moro nanga moro e kisi a belangstelling foe sma tapoe a kontren foe datratori: dresi nanga oparâsi sondro broedoe.
Den ben taki foe difrenti moeilek situwâsi. Foe eksempre, san efoe wan sikisma wantronso no abi nofo broedoe? Fa den kan dresi wan beibi di gebore toemoesi froekoe sondro foe gi en broedoe? Den kan opareer na ati nanga boen bakapisi sondro broedoe transfusie? A de moi foe si, taki na ini ala den situwâsi disi den doe oparâsi kaba sondro broedoe — pe nofo tron den e gebroiki sani foe jepi a skin meki en eigi broedoe — èn den ben abi boen bakapisi.a
Foe san ede a de fanowdoe foe gebroiki tra sani leki broedoe transfusie? „Wi kon si taki broedoe transfusie nofo tron e gi siki abra, spesroetoe hepatitis”, na so Sharon Vernon e taki, driktoro foe a Centrum gi Dresi nanga Oparâsi sondro Broedoe foe a St. Vincent Charity ati-oso na Cleveland. A e go doro: „Srefi te broedoe no e gi wan infectie-siki abra, tokoe a kan swaki a fasi fa a sikisma man feti nanga siki.” Ala di AIDS no e gi abra so foeroe moro foe di den e ondrosoekoe broedoe, tokoe foeroe siki de ete di den sortoe ondrosoekoe dati no man feni. Èn ala di a de fanowdoe foe sreka sani moro fini, tokoe oparâsi sondro broedoe sori foe de moro boenkopoe gi ati-oso, foe di den no e kisi problema nanga a wet di kan kon te wan sikisma e kisi broedoe di no ben boen.
Gi Jehovah Kotoigi, wan moro prenspari reide de foe den no teki broedoe: Gado wet no e gi pasi foe dati (Tori foe den Apostel 15:29). Tokoe, den wani foe datra jepi den na a moro boen fasi di de. Dati meki den wroko makandra nanga datra di e teki fesi na ini ondrosoekoe di e doe foe kan dresi sma sondro broedoe. A dresi di den e dresi sma na a fasi disi no de wan wini gi Jehovah Kotoigi nomo, ma gi someni trawan toe di e broko den ede nanga den kefar foe broedoe transfusie.
[Foetoewortoe]
a Loekoe Ontwaakt! foe 22 november 1993, bladzijde 24-27, nanga di foe 22 januari 1996, bladzijde 31.
[Sma di abi a reti foe a prenki na tapoe bladzijde 32]
WHO fowtow di P. Almasy meki