„No jagi den!”

„EFOE wan Kotoigi foe Jehovah, noso toe srefi, ben sa kon na joe doro, no jagi den!” na so Corriere della Sera e gi leki rai. A koranti ben sori go na wan sani di ben pasa na Treviso, noordsei foe Italia, pe wan bisnisman pikinmoro ben lasi moro leki wán miljoen lire (moro leki 600 Amerkan dala), foe di a ben jagi toe Kotoigi di ben fisiti en.

Soleki fa a koranti ben taki, dan toe Kotoigi ben kon na en èn den ben bigin nanga den wortoe: „Tide na wan boen dei gi joe. Wi na Jehovah Kotoigi, èn wi abi wan sani foe gi joe di warti gi joe.” Ne a bisnisman di no ben abi switifasi, tapoe a doro èn a no ben gi den na okasi foe kaba taki.

Efoe a man ben arki, dan a ben sa kon sabi taki den Kotoigi ben kon na en oso foe gi en a potmoni foe en baka, di den ben feni na tapoe wan bangi na ini wan park. So boen, den Kotoigi no ben man doe noti moro leki foe tjari a potmoni nanga san ben de na ini, go na a moro krosibei skowtoe-oso. A tra dei, skowtoe ben tjari en go na a sma di ben abi en.

„Efoe wan tra sma ben de ini a situwâsi foe den toe [Kotoigi] di no ben abi boen bakapisi”, na so Il Gazzettino di Treviso ben taki, „dan kande a ben o . . . hori a potmoni di ben abi a bigi moni na ini. Ma Jehovah Kotoigi, di moesoe de eerlijk dorodoro, no e doe dati.”

San e boeweigi Jehovah Kotoigi foe de „eerlijk dorodoro”? Na a lobi di den abi gi Gado èn gi a sma na den sei, soleki fa Jesus Krestes ben leri (Mateus 22:37-39). Dati na foe san ede Jehovah Kotoigi e go oso foe oso toe foe meki a boen njoensoe bekènti foe a toemoesi moi „njoen grontapoe” di Jehovah Gado ben pramisi. So wan boskopoe foe howpoe warti krinkrin moro iniwan materia goedoe! — 2 Petrus 3:13.