Wan tijdschrift di e naki sma ati

NA HERI grontapoe, wan heri ipi tijdschrift e kon na doro foe kowroe na angri di sma angri foe leri sani noso foe kisi ontspanning.

San meki a tijdschrift na joe anoe de so aparti? Kande a brifi di e kon now, di a bijkantoro foe a Waktitoren Genootschap foe Doisrikondre ben kisi, sa gi joe wan piki:

„Grantangi, mi lobi brada, foe a moeiti di oenoe e meki èn foe a wroko foe oenoe. Di mi nanga mi toe manpikin ben kon foe a konmakandra, dan mi ben moesoe arki a njoen Waktitoren [tapoe cassette] nomo, ala di a ben de 9.30 na neti. Di mi ben wasi den dotisani, dan mi ben bigin arki a fosi studie artikel (1 april 1995). Mi ben kisi a firi foe arki en ete wan leisi, dati meki mi ben tapoe nanga a wroko di mi ben doe na ini a koekroe èn ben leisi na artikel [„Joe warti foeroe na ini na ai foe Gado!”] na ini A Waktitoren, makandra nanga a cassette. A ben naki mi ati, spesroetoe a di foe fo nanga di foe feifi paragraaf. Ne mi ai ben bigin lon watra — ma dati no ben de langa. Mi e taigi Jehovah tangi taki mi e libi èn de na ondro en pipel èn taki mi, makandra nanga someni trawan, kan meki en nen bekènti. Troetroe no wan reide de foe abi a firi taki wi no warti notinoti. A jeje foe Jehovah de nanga en pipel. Meki wi alamala horidoro èn tanapoe kánkan ini a bribi, na ini wánfasi. Nanga kresten firi foe lobi, joe sisa ini a bribi.”

A Waktitoren e doe moro leki foe leri sma sani nomo. A e naki na ati foe den sma di e leisi en èn a e kowroe na angri di den angri gi njanjan na jejefasi èn a e gi den deki-ati di e kon na a joisti ten. Ija, A Waktitoren e gi „njanjan na a reti ten”. — Mateus 24:45.