„Wi alamala de foe a srefi famiri”
A KROETOE di sma e kroetoe makandra foe relisi ede èn a desko di den e desko sma foe wan tra ras, panja ensrefi na heri grontapoe na ini den jari di no pasa so langa ete. Kesekese di ben de na mindri difrenti ras tjari kiri kon, noso a pina di sma e pina trawan, èn tra kefalek takroe ogridoe di de wan sjen. Soleki fa wan verslag foe Amnesty International e taki, dan foe di sma ben doe ogri na den reti di libisma abi, meki na ini 1994, moro leki 23 miljoen sma na heri grontapoe ben moesoe lowe komoto na a tanpresi foe den.
Na Rwanda wawan, den ben kiri so wan 500.000 sma èn moro leki 2.000.000 trawan ben tron loweman baka di tranga ogridoe ben bigin na mindri den Toetsi nanga den Hoetoe. „Den ben froefolgoe Jehovah Kotoigi spesroetoe”, Le Soir, a koranti foe Belgia, e froeteri, „foe di den ben weigri foe tjari fetisani.” Jehovah Kotoigi no e teki prati na a feti di sma e feti nanga fetisani. Ma tokoe, sma ben kiri hondrohondro foe den na ini na ogri di sma ben doe nanga tranga. Disi e meki wi prakseri den wortoe di Jesus ben taigi den disipel foe en: „Foe di oenoe no de wan pisi foe grontapoe, . . . grontapoe no wani si oenoe na ai.” — Johanes 15:19.
Wan Kotoigi osofamiri — Eugène Ntabana, en wefi, nanga toe pikin — ben libi na ini a foto, Kigali. Te Eugène ben tjari kon na krin gi den birtisma foe en foe san ede a ben tan neutraal, dan nofo tron a ben taki foe a bougainville, wan prani di e kren èn e libi na ini den waran kontren. — Mateus 22:21.
„Dja na Kigali”, Eugène ben sa tjari kon na krin, „a bougainville abi redi, ròs, èn son tron weti bromki. Tokoe den alamala de foe a srefi famiri. A de so toe nanga libisma. Ala di wi de foe difrenti ras, skin kloroe, noso background kande, tokoe wi alamala de foe a srefi famiri, a famiri foe libisma.”
Na wan sari taki, ala di na osofamiri Ntabana ben lobi vrede èn ben tan neutraal, tokoe wan groepoe ogri-ati sma ben kiri den. Tokoe den dede getrow. Wi kan de seiker taki Jehovah Gado sa meki a pramisi foe en kon troe gi den sma dati, èn den sa opo baka foe kisi wan grontapoe pe a kroetoe di sma e kroetoe makandra sondro reide, no sa de moro (Tori foe den Apostel 24:15). Dan na osofamiri Ntabana, makandra nanga tra sma, sa „feni switi prisiri na ini vrede pasa marki”. — Psalm 37:11.