Soema abi a fowtoe taki orlokoe de?

NA Gado abi a fowtoe gi den orlokoe di a libisma famiri ben feti? „Nôno, Gado no wani orlokoe.” Dati na fa Martin Niemöller, wan barinen Doisri Protestant kerki tiriman ben piki na aksi disi, sjatoe na baka a kaba foe a di foe Toe Grontapoefeti. Den wortoe foe en ben tjari kon na doro na ini 1946 na ini wan boekoe di nen Ach Gott vom Himmel sieh darein — Sechs Predigten (O Gado, loekoe komoto na hemel — siksi lezing).a A boekoe e taki:

„A sma di wani gi Gado a fowtoe gi [orlokoe] no sabi a Wortoe foe Gado, noso no wani sabi a Wortoe foe Gado. Ma disi na wan tra tori efoe wi leki kresten abi foeroe fowtoe toe ofoe no, gi den orlokoe di e tan go doro. Èn wi no man wai pasi so makriki gi na aksi disi. . . . Wi kan memre wisrefi heri boen ete taki na ini ala den jari den kresten kerki, ibri tron baka ben gi densrefi foe blesi den orlokoe, den legre, nanga den fetisani èn taki den ben begi na wan kefalek fasi di no e fiti kresten, foe pori den feanti foe den na ini orlokoe. Ala den sani disi na wi fowtoe èn a fowtoe foe wi afo, ma kwetikweti no a fowtoe foe Gado. Èn wi leki kresten foe a ten disi e sjen na fesi wan so-kari sekte leki den Serjoesoe Bijbelstudenti [Jehovah Kotoigi], di hondrohondro nanga doesoendoesoen foe den ben go na ini konsentrâsi kampoe èn ben dede [srefi] bika den no ben wani doe sroedati wroko èn ben weigri foe soetoe na tapoe libisma.”

Na ini a ten disi, so wan 50 jari na baka a di foe Toe Grontapoefeti, den wortoe foe Niemöller e gi sma di lobi vrede wan sani foe prakseri finifini. Nôno, a no Gado abi a fowtoe gi a trowe di den nâsi e trowe broedoe! Ija, nanga jepi foe den troe anbegiman foe en di no abi wan prati na den feti foe grontapoe, Gado e meki bekènti taki a kaba foe ala orlokoe de heri krosibei. — Psalm 46:9; Johanes 17:16.

[Foetoewortoe]

[Sma di abi a reti foe a prenki na tapoe bladzijde 32]

USAF fowtow