Ala den santa boekoe kon foe Gado?
A ben kan taki a jeje foe Gado, di ben meki sma skrifi a Santa bijbel, de frantiwortoe toe gi tra boekoe di sma e si leki santa boekoe? (2 Timoteus 3:16) Disi na a aksi di wan Italia Jesuit tijdschrift (La Civiltà Cattolica) ben poti, di tjari kon na doro „na ondro a tiri foe a [Vaticaan] Staats Secretariaat”, èn foe dati ede sma e erken en na kontren pe Katolik e tiri.
„Nanga jepi foe a wroko foe Santa Jeje, Gado ben panja a siri foe a Wortoe srefi na ini wan toe santa boekoe foe wan koeltoeroe di no de foe djoe èn di no de foe kresten”, na so a Jesuit tijdschrift ben taki. Gi den Jesuitsma, den „santa” boekoe, soleki na Avesta foe a Zoroastrisch relisi noso den Fo Boekoe foe a Confucianistisch relisi, ben skrifi „no sondro taki a Santa Jeje ben abi wan ról na ini, èn foe dati ede, den abi wan toe sani na ini ’di kon foe Gado.’”
Ma na artikel e tjari wan sani kon na krin. A ben taki dati „a no ala sani di de ini den sortoe santa boekoe disi, na a wortoe foe Gado”, èn a e taki moro fara taki kande ’den presi pe sma e dini foeroe gado noso pe filosofia lai, ben abi krakti na tapoe’ den sma di ben libi èn ben skrifi drape. Akroederi Marco Politi, a man di e correspondeer foe Vaticaan afersi, gi na Italia koranti La Repubblica, a bribi disi taki Santa Jeje ben plei wan ròl na ini wan toe tra santa boekoe, „opo na okasi foe matifasi na mindri a Katolik Kerki nanga den bigi barinen relisi”, wan sani di sma ben denki taki a no ben sa kan fosi, èn foe bigin baka nanga na idea foe meki difrenti kerki kon makandra foe begi makandra, soleki a wan di ben hori na Assisi na ini 1986, gi san Johannes Paulus II ben horibaka fajafaja.
Jehovah a no wan Gado foe broeja (1 Korentesma 14:33). Foe dati ede wi no kan prakseri nanga reti taki en santa jeje, noso wroko krakti, ben sa wroko srefi na tapoe wan pisi foe iniwan boekoe di no de krinkrin na ini wánfasi nanga en Wortoe, bijbel. Na presi foe gi deki-ati meki difrenti „relisi gwenti”, na heri grontapoe bondroe kon na wán, a kresten apostel Paulus ben skrifi taki „wán-enkri howpoe . . . , wán Masra, wán bribi, wán dopoe” de. — Efeisesma 4:4, 5.
A „wán-enkri howpoe” dati e anga foe a bribi na ini Jesus Krestes. Bijbel e taki joisti: „Froeloesoe no de ini no wan tra sma, bika no wan tra nen de na ondro hemel di gi na mindri libisma nanga jepi foe soema wi moesoe kisi froeloesoe” (Tori foe den Apostel 4:12). No wan enkri tra „santa boekoe” e taki foe Jesus leki a moro prenspari sma na ini a kon di den prakseri foe Gado sa kon troe. Soso efoe wi e teki bijbel leki a Wortoe foe Gado, a kan leri wi den lobi-ati sani di Jehovah Gado seti foe man kisi froeloesoe. — Johanes 17:3; 1 Tesalonikasma 2:13.