Wan tra wini gi Jehovah Kotoigi na ini Grikikondre

NA tapoe 6 oktober 1995, dri memre foe a Lantiman Skowtoe Kroetoe-oso na Athene ben hori wan kroetoe di abi foe doe nanga toe foeroeten dinari foe Jehovah Kotoigi. A kroetoe ben de a proeberi di sma e proeberi foe overtoigi tra sma foe teki a bribi foe den, èn a sma di ben tjari a tori go na kroetoe ben de wan skowtoe, na baka di den Kotoigi ben fisiti en na en oso.

Den aksi di a fesiman kroetoeman ben poti, ben sori taki a ben abi foeroe belangstelling gi a wroko foe Jehovah Kotoigi. Foe eksempre, a ben aksi: „O langa joe e doe a wroko disi kaba? Fa sma handri oenoe na ini den jari di pasa? Sortoe bakapisi a wroko foe joe ben abi? San joe e taigi den sma te joe de na den doro foe den?” Ala sma di ben de na ini a kroetoe-oso ben poti prakseri na tapoe a moi kotoigi di ben gi.

A ben de wan froewondroe sani gi den Kotoigi, taki srefi na lanti-afkati ben taki gi a boen foe den. „Jehovah Kotoigi abi a reti na ini a mamawet foe no bribi wawan na ini a Gado foe den èn foe anbegi en”, a ben taki na den kabawortoe foe en, „ma so srefi foe prati a bribi foe den oso foe oso, na ini poebliki pren, èn na tapoe strati, èn srefi foe prati den poeblikâsi foe den sondro foe aksi moni, efoe den wani”. Na lanti-afkati ben kari difrenti leisi di den kroetoebangi nanga a Staatsraad ben bosroiti foe meki sma kon fri na ini den sortoe afersi disi. A ben taki toe foe a kefal foe Kokkinakis teige Grikikondre, di na Europese Hof voor de Rechten van de Mens ben bosroiti gi a boen foe den Jehovah Kotoigi.a „Grantangi, hori na prakseri”, na so a lanti-afkati ben warskow, „taki Grikikondre ben pai srefi wan boetoe ini a kefal disi. So boen, wi moesoe loekoe boen srefisrefi te wi moesoe kroetoe den sortoe afersi disi. Foe taki en leti, foe bigin, den sortoe kefal disi noiti ben moesoe tjari srefi kon na kroetoe.”

Na baka den wortoe foe a lanti-afkati, na afkati foe den Kotoigi no ben abi foeroe foe taki moro gi den. Ma tokoe a ben teki na okasi foe poti krakti na tapoe taki a wet di e kroetoe a proeberi di sma e proeberi foe overtoigi tra sma foe teki a bribi foe den, no de akroederi a mamawet èn taki a wet meki Grikikondre kon na ini problema na wan internationaal fasi.

A fesiman kroetoeman ben loekoe soso den toe tra kroetoeman, èn leki wán man den ben fri a brada nanga a sisa. A kroetoe di ben tan wán joeroe nanga tin miniti, ben de wan wini gi a nen foe Jehovah èn gi a pipel foe en.

Disi na a di foe fo leisi di den ben meki den kon fri na ini afersi di abi foe doe nanga a proeberi di sma e proeberi foe overtoigi tra sma foe teki a bribi foe den, na baka di na Europese Hof voor de Rechten van de Mens ben hori a kroetoe ini a kefal foe Kokkinakis. Jehovah Kotoigi na ini Grikikondre breiti taki den problema di abi foe doe nanga a preikiwroko foe den, pikinmoro no de moro èn taki den man foe go doro nanga a wroko sondro taki sani e hendri den.

[Foetoewortoe]