Soema e tiri?
„SOEMA e tiri grontapoe?” Efoe wan sma ben sa aksi joe a sani disi, fa joe ben sa piki? Foeroe kerki sma ben sa taki: „Gado” noso „Jesus”. Wan artikel di ben de ini The Freeport News, wan koranti foe Bahamas, ben gi wan piki di weiniki sma ben sa froewakti.
„Mi ben feni wan traktaat na mi doro stoepoe”, na so a skrifiman foe na artikel e bigin. „Moro foeroe mi no ben sa leisi wan sani di sma poti na mi doro stoepoe, ma a leisi disi mi ben bosroiti foe leisi en. Na edeprakseri ben poti na aksi: „Soema na troetroe a tiriman foe grontapoe?’” Di a ben leisi a traktaat disi di abi en gron tapoe bijbel, na oema disi ben leri taki a tiriman foe a grontapoe disi a no Gado èn a no so srefi Jesus, ma Satan Didibri. — Johanes 12:31; 14:30; 16:11; 1 Johanes 5:19.
„Prakseri fa sma e kiri makandra na ipi-ipi sondro foe a e doe den wan sani”, na so a traktaat e froeklari. „Libisma gebroiki gas kamra, strafoeman kampoe, fetisani di e spiti faja, napalmbom, nanga tra ogri-ati fasi foe gi makandra hebi skin-ati èn foe kiri makandra sondro foe abi sari-ati. . . . Sortoe makti e meki sma doe den takroedoe disi noso e tjari den go na ini situwâsi di e dwengi den foe doe den toemoesi ogri sani disi? Joe ben aksi joesrefi wan dei, efoe wan ogri makti di wi no kan si abi krakti tapoe sma foe doe den sortoe ogri disi di e doe nanga tranga?” A de foe froewondroe taki bijbel e kari Satan „a gado foe a seti foe sani disi”? — 2 Korentesma 4:4.
Kolokoe, a ten de krosibei te Satan nanga den ogri jeje foe en no sa de moro. „Grontapoe e pasa gowe èn so srefi a lostoe foe en, ma a sma di e doe a wani foe Gado, e tan foe têgo” (1 Johanes 2:17). Ija, bijbel e pramisi taki den sma di e doe a wani foe Gado, abi a howpoe foe libi foe têgo na ini wan regtfardiki njoen grontapoe (Psalm 37:9-11; 2 Petrus 3:13; Openbaring 21:3, 4). A sa de wan bigi froelekti te den sa poeroe na ogri makti foe Satan nanga den ogri jeje foe en!
Baka di a skrifiman foe The Freeport News ben skrifi sjatoe san skrifi na ini a pikin traktaat disi, a ben bosroiti: „Mi breiti srefisrefi taki mi ben leisi a traktaat dati . . . bika mi srefi broko mi ede nanga a situwâsi foe a grontapoe, èn soema e tiri en.”