Tapoe den falsi kragi na Fransikondre
NO SO langa pasa, Jehovah Kotoigi na Fransikondre ben de a marki foe wan lo falsi kragi. Foe man kisi wini foe den kefalek takroe sani di ben feni presi na Europa nanga Japan, di abi foe doe nanga relisi sekte, dan a media ben panja heri tra njoensoe foe den Kotoigi. Na wan fowtoe fasi den ben taki dati Jehovah Kotoigi na wan foe den moro bigi èn moro kefalek sekte.
Foe poti a tori kon reti, Jehovah Kotoigi ben tjari wan traktaat kon na doro di ben gi piki tapoe den aksi soleki disi: Soema na Jehovah Kotoigi? Den na kresten? Den e teki jepi foe datra? Foe san ede den e go oso foe oso? Fa den e sorgoe gi a wroko foe den na moni sei? Fa Jehovah Kotoigi de wan winimarki gi a libimakandra?
A traktaat disi di abi foeroe bodoi èn di ben skrifi na ini a Fransi tongo, ben nen Jehovah’s Witnesses—What You Need to Know (Jehovah Kotoigi — San joe moesoe sabi). Wan wroko ben orga foe man libi a traktaat gi so foeroe sma leki a kan. Foe 13 mei te go miti 9 juni 1996, moro leki neigi miljoen traktaat ben prati.
A traktaat disi ben naki na ati foe foeroe sma, so srefi poebliki lantiman. „A kroetoe di sma ben kroetoe Jehovah Kotoigi ben meki mi atibron”, na so wan raadslid foe a kontren ben skrifi na baka di a ben leisi a traktaat. „Foeroe tron mi e warderi a wroko foe oenoe di oenoe e doe gi a boen foe tra sma èn pe oenoe no e soekoe oen eigi boen nomo.” Leki wan bakapisi na tapoe a traktaat, wan memre foe na Europees Parlement ben skrifi foe a traktaat disi: „A moro bigi pisi foe den sma sabi heri boen èn kan si a difrenti na mindri kresten, di oenoe de wan pisi foe den, nanga den sekte.”
Na Bretagne, wan Kotoigi ben pristeri a traktaat gi wan priester èn a priester ben teki en wantewante. „Mi e prèise oenoe gi san oenoe e doe”, a priester ben taki. Dan a ben taki moro fara: „Mi e gi den kerkisma foe mi a deki-ati foe meki oenoe kon na ini den oso èn foe gi oenoe wan kopi kofi. Joe kan taigi srefi den sma di joe e miti na ini a diniwroko, taki joe ben de na mi oso. Mi wani taigi joe toe taki mi e warderi en foe leisi den poeblikâsi foe joe.”
Baka di wan protestant man na a Elzas ben kisi a traktaat, a ben skrifi go na a Waktitoren Genootschap foe aksi wan bijbelstudie. „Foe di mi lasi ala froetrow na ini mi kerki”, a ben skrifi, „mi wani srefisrefi foe bigin baka na jejefasi.” Ala di falsi kragi ben poti teige Jehovah Kotoigi na Fransikondre wanwan leisi — ija, na ala presi na grontapoe — tokoe den e tan jepi sma foe kisi wan soifri sabi foe den prakseri foe Gado, soleki fa a skrifi na ini bijbel. — 2 Timoteus 3:16, 17.