Wan trow foe 403 jari de na ini problema
NA Sweden, Kerki nanga Lanti ben abi wan krosibei matifasi gi moro leki 400 jari langa. Now a trow na mindri relisi nanga lanti e kon swaki.
A Luther bribi ben poti leki a relisi foe Lanti na ini 1593, èn ala Swedensma ben moesoe de memre di dopoe. Foeroe jari na baka, na mindri 1850 nanga 1860, den ben tjari wan kenki kon. A no ben de fanowdoe moro taki den Swedensma ben moesoe teki dopoe; ma tokoe den ben si den ete leki memre foe a Luther Kerki. Leki memre, den ben moesoe pai 1 procent foe a moni di den denki taki den e wroko, foe horibaka gi a kerki èn foe pai gi bepaalde wroko di a kerki ben doe gi den borgoe. Moro krosibei na ini a ten disi, den ben tjari wan tra kenki kon. Sensi 1952, soleki fa wet ben skrifi, dan den Swedensma ben kan hari densrefi poeroe foe a kerki èn nanga dati den no ben abi foe pai a moro bigi pisi foe a kerki-belasting.
Na ini den jari no so langa pasa, a Luther Kerki ben tan lasi en makti na Sweden. Disi na wan sani di den no ben kan tapoe foe feni presi, foe di 10 procent foe den sma di e libi na Sweden, na immigrant di no de foe a Luther bribi, so srefi djoe, Katolik, nanga Moslimsma. Foe dati ede, na a bigin foe 1996, soso 86 procent foe den Swedensma ben de foe a Luther Kerki, èn a nomroe e tan kon moro mendri.
A kon di a mi-no-ke fasi e kon moro foeroe, e meki wan olo kon na mindri Kerki nanga Lanti. Now kaba den froeklari taki a kownoe no abi foe de wan Luthersma, èn pikin-nengre di gebore foe papa noso mama di na Luthersma, no abi foe de memre foe a Luther Lanti Kerki wantewante. Moro fara, soleki fa The Dallas Morning News e taki, na ini a jari 2000, „den kerki libimakandra nanga lanti moesoe loekoe a waarde foe den sani di de foe a kerki èn den moesoe prati en. A kerki moesoe meki a moni foe 1, 68 miljard Amerkan dala di a e kisi ala jari, kon moro mendri, èn a moni di Lanti ben kisi moro foeroe foe belasting”. Na baka a jarihondro disi, a kerki sa poti en eigi biskopoe, na presi foe Lanti.
Ala di a mi-no-ke fasi èn a kon di den memre e kon moro mendri, de wan problema gi krestenhèit, tokoe Jehovah Kotoigi na Sweden e tan gro. A Jaarboek van Jehovah’s Getuigen 1997 e froeteri taki 24.487 preikiman foe Gado Kownoekondre de na ini a kondre dati, èn pikinmoro 10 procent foe den e preiki leki foeroeten pionier bedinari. Foeroe foe den disi e soekoe moro bigi grani foe dini. Foe eksempre, na den distriktkongres foe 1995 foe Jehovah Kotoigi, 20 trowpaar ben gi den formulier foe kisi leri leki zendeling na a Waktitoren Bijbelskoro Gilead. Na a ten dati, pikinmoro 75 sma ben de foe Sweden di ben pasa Gilead èn di ben de na ini a zendingwroko na difrenti presi na grontapoe. Seiker, a boen eksempre foe den èn den brifi di ben gi deki-ati èn den fisiti foe den na Sweden, ben poesoe den wan now di e prakseri foe a bigi grani disi.
So boen, ala di den miljoenmiljoen memre foe krestenhèit e brokosaka, Jehovah Kotoigi e „bari foe prisiri bika foe a boen kondisi foe na ati”. — Jesaja 65:13, 14.
[Karta na tapoe bladzijde 30]
(Efoe joe wani si pe den sani disi skrifi, loekoe a tijdschrift)
Sweden