A djaranti de taki nofo njanjan de gi heri grontapoe — Nanga jepi foe san?

„A MORO boen moeiti di wi e doe no de nofo kande foe tan abi a djaranti foe njanjan di wi ben abi a moro bigi pisi foe a jarihondro disi”, na so Lester Brown, presidenti foe Worldwatch Institute na Washington, D.C., e froeklari. Soleki fa a New Scientist tijdschrift e sori, na a bigin foe 1995, a karoe di grontapoe ben hori na baka-anoe, ben saka fositron kon doro 225 miljoen ton — dati nofo foe gi sma na grontapoe njanjan gi soso 48 dei. Na ini den jari na fesi, di a karoe di den ben hori na baka-anoe ben saka kon moro mendri leki a 60-dei marki, a voorraad ben man kon boen baka. Ma now Worldwatch no de seiker efoe grontapoe sa man foe wini baka san a ben lasi.

Baka dri jari foe kotiwroko di no ben go boen èn nanga moro pôti kondre di e gebroiki karoe leki njanjan gi den meti foe den, moro mendri karoe de foe kisi gi den pôtisma di wani en leki wan prenspari pisi foe a njanjan foe den. New Scientist e warskow taki efoe a situwâsi no e kisi prakseri wantewante, dan den wán miljard sma di e gebroiki no moro mendri leki 70 procent foe a moni di den e wroko, gi njanjan, kan bigin dede foe angri.

Bijbel ben taki na fesi taki den sma na ini wi ten di e libi na grontapoe ben sa ondrofeni „mankeri foe njanjan” (Lukas 21:11). Ma Gado no e tapoe en ai gi a problema. Ija, a broko di a e broko en ede nanga a takroe situwâsi foe libisma, sa de foe si te foe kaba te en Kownoekondre sa tiri na tapoe den afersi foe grontapoe. Na a ten dati „grontapoe srefi sa gi troetroe en njanjan”. „Foeroe karoe sa de na grontapoe; na tapoe na ede foe den bergi sani sa de pasa marki” (Psalm 67:6; 72:16). Dan den profeitis wortoe disi di abi foe doe nanga a Kriaman sa kon troe: „Joe poti joe prakseri na a grontapoe, so taki joe kan gi en bogobogo . . . Den lagi presi srefi domroe nanga karoe.” — Psalm 65:9, 13.

A toemoesi moi pramisi dati e hari joe? Joe ben sa wani sabi fa joe kan de wan pisi foe en? Dan aksi Jehovah Kotoigi foe froeteri joe moro foe a paradijs disi di Gado pramisi, a tra leisi te den e kon na joe doro. Efoe joe ben sa wani wan sma kon na joe oso foe hori wan oso-bijbelstudie nanga joe sondro foe pai gi dati, dan grantangi skrifi go na a Watch Tower Society, P.O. Box. 2914, Paramaribo, Suriname, noso skrifi go na wan foe den adres di skrifi tapoe bladzijde 2.

[Prenki na tapoe bladzijde 32]

Inzet: Pictorial Archive (Near Eastern History) Est.