’Na Gado mi sa soekoe mi kibripresi’
NA INI den ’moeilek ten disi di tranga foe pasa’, tesi nanga druk e kon moro foeroe leki oiti bifo. Foe eksempre, na eerlijkfasi foe wi kan kisi tesi na wrokope. A krinfasi foe wi kan kisi tesi na mindri skoromati. Èn nofotron a grontapoe di pori na moreel sei e tesi a soifri retifasi foe wi. — 2 Timoteus 3:1-5.
A bijbel skrifiman Asaf ben libi so srefi na ini wan ten di godelowsoefasi ben gro. Wan toe sma di ben libi na ini a ten foe en ben djaf srefi foe a godelowsoefasi fa den ben e tjari densrefi. „Heimemre de leki wan nekiketi gi den”, Asaf ben skrifi. „Ogri di e doe nanga tranga e domroe den neleki wan krosi. Den e spotoe èn e taki foe takroe sani; foe bedrigifasi den e taki na wan bigi fasi” (Psalm 73:6, 8). Joe sabi a fasi disi fa sma e tjari densrefi?
Sowan sortoe fasi fa sma e tjari densrefi, e pina den sma srefisrefi di wani doe san boen, èn e meki den lasi-ati srefi. „Heri dei sani ben tanteri mi”, Asaf ben kragi. „A ben de wan moeilek sani na mi ai” (Psalm 73:14, 16). Kande joe e firi a srefi fasi, ma no lasi-ati! Asaf ben man foe kakafoetoe gi a godelowsoefasi foe en ten, èn joe kan doe a srefi sani. Ma fa?
Asaf ben kon froestan taki troe retidoe na wan sani di pikinmoro no man de foe feni na ondro na onvolmaakti tiri foe libisma (Psalm 146:3, 4; Odo 17:23). So boen, na presi taki a ben lasi en warti ten, krakti, nanga goedoe, foe proeberi poeroe ala godelowsoefasi na en lontoe, a ben poti en prakseri na tapoe a matifasi di a abi nanga Gado. Asaf ben froeklari: „Foe mi sei, a kon di mi e kon krosibei na Gado, boen gi mi. Na ini a Soeverein Masra Jehovah, mi soekoe mi kibripresi.” — Psalm 73:28.
Na ini a ten disi, den sma di e doe kroektoe bisnis, nofotron abi materia winimarki. Foeroe kande e djaf srefi foe a sori di den no e sori lespeki gi den moreel wet foe Gado. Ma den no sa wini ala ten. „Ija, na tapoe grati gron joe poti den”, Asaf ben taki. „Joe meki den fadon tron wan broko presi.” — Psalm 73:18.
Ija, na a reti ten foe Gado, bedrigifasi, ogri di e doe nanga tranga, nanga kroektoedoe, èn so srefi ala den tra godelowsoe sani di troe kresten no moesoe doe, no sa de moro. Bijbel e pramisi: „Den ogri sma srefi sa koti poeroe, ma den sma di e howpoe tapoe Jehovah na den wan di abi grontapoe leki a goedoe foe den” (Psalm 37:9). Disiten, meki wi taki den wortoe foe a psalm singiman baka, di ben taki: „Jehovah na mi klipston di e tanapoe leti-opo èn mi fortresi èn a Sma di e sorgoe taki mi feni kibri. Mi Gado na mi klipston. Na en mi sa soekoe kibri.” — Psalm 18:2.