„Wroko leki srafoe gi Masra, Krestes”
NA INI a heri historia, miljoenmiljoen sma pina na ondro a hebi foe katibo. Doesoendoesoen jari pasa kaba, foe eksempre, den basja foe Egipti ben pina den Israèlsma kefalek. Soleki fa bijbel e taki, dan den „ben poti basja foe srafoe tapoe den Israèlsma foe swaki den na ondro hebi lai”, spesroetoe foe meki ston. — Exodus 1:11, The Jerusalem Bible.
Na foeroe kondre na ini a ten disi, sma kande no e wroko troetroe leki srafoe, ma foeroe sma moesoe wroko langa joeroe di soi, na ondro situwâsi di e aksi foeroe foe den — sontron sma no e sori switifasi. Den de na ondro a hebi foe san wi ben sa kan kari katibo na ekonomia sei.
Ma wan tra fasi foe katibo de di no de wan hebi sani. Na apostel Paulus ben gi kompe bribiman a tranga: „Wroko leki srafoe gi Masra, Krestes” (Kolosesma 3:24). Den wan di e froekisi foe tron srafoe foe Krestes e feni froelekti foe den hebi lai foe den. Jesus srefi ben taki: „Kon na mi, oen alamala di e wroko tranga èn di abi hebi lai, èn mi sa gi oenoe kowroe-ati. Teki mi tjatjari na oen tapoe èn leri foe mi, bika mi abi safrifasi èn sakafasi foe ati, èn oenoe sa feni kowroe-ati gi oen sili. Bika mi tjatjari safoe èn mi lai lekti.” — Mateus 11:28-30.
Te wan sma e teki a tjatjari foe Krestes, dan dati no e poeroe a froeplekti di a sma abi foe sorgoe na materia sei gi en osofamiri (1 Timoteus 5:8). Ma a e meki a sma kon fri foe foeroe foe den trapoe foe a feti di sma e feti na baka materia goedoe. Na presi foe meki materia sani di e meki a libi kon moro makriki, de a moro prenspari marki na ini a libi, kresten de tevrede nanga den fondamenti sani di den abi fanowdoe. — 1 Timoteus 6:6-10; teki gersi 1 Korentesma 7:31.
Kresten e feni kowroe-ati toe te den e doe a frantiwortoe di den abi foe preiki a „boen njoensoe” foe a Kownoekondre foe Gado (Mateus 24:14). Disi e tjari troetroe prisiri nanga satisfaksi kon!
Wi moesoe de nanga tangi taki wi kan „wroko leki srafoe gi Masra, Krestes”!
[Prenki na tapoe bladzijde 32]
Pictorial Archive (Near Eastern History) Est.