Te Jehovah Kotoigi e tjari fisiti

San den Katoliksma moesoe doe te wán foe den Jehovah Kotoigi e tjari fisiti na den oso foe den? Wan poeblikâsi di a National Catechistic Bureau of the Italian Bishops’ Conference ben meki no so langa pasa, e taki: „Te joe e weigri na wan switi fasi ma tokoe serjoesoe foe no taki nanga wan foe den Jehovah Kotoigi, dan na ini a kefal disi, dati no wani taki dati joe e handri grofoe.”

A no ala Katoliksma e agri, soleki fa wan brifi e sori di wan man di e libi na ini Foggia, Italia, ben seni go na a aladei koranti Gazzetta del Mezzogiorno:

„Mi a no wan foe den Jehovah Kotoigi. Mi na wan Katoliksma. Ma mi e froewondroe foe son wet di a kerki e poti na tapoe den bribisma, te a e taigi den foe poti boskopoe na den doro foe den foe seni den Jehovah Kotoigi gowe. Boiti dati, den sma disi e preiki Gado Wortoe nomo, èn den e jepi tra sma foe kisi wan moro dipi sabi foe bijbel. Den sani disi e memre mi foe a ten di Italia ben pina foe cholera èn wi ben kisi rai fa foe no kisi na infektie.

Soleki fa mi e si en, disi e sori taki a kerki e poti en eigi wet sondro foe hori na prakseri san den bribisma wani. Ma wan toe jari kaba, mi si taki srefi Katoliksma e go oso-foe-oso, èn e fisiti den oso foe den Jehovah Kotoigi so srefi; èn den Jehovah Kotoigi e meki den kon na inisei, e taki nanga den, sondro foe weigri foe taki nanga iniwan sma.”

Jehovah Kotoigi no e dwengi sma foe teki a boskopoe foe den. Na presi foe dati, den e doe moeiti foe prati nanga tra sma a howpoe di e kon na krin na ini Gado Wortoe, di densrefi feni taki a e gi trowstoe na ini den moeilek ten disi. Te den e doe disi oso-foe-oso, èn so srefi te den e taki nanga den sma di den e miti na strati, den Jehovah Kotoigi e prati a boen njoensoe foe Gado Kownoekondre nanga den sma di wani arki. — Mateus 24:14; Tori foe den Apostel 5:42; 17:17.