Kownoekondre preikiman e froeteri

A ben feni wan „peri foe bigi waarde”

„A KOWNOEKONDRE foe hemel de leki wan bisnisman di e waka doe bisnis èn di e soekoe peri di moi srefisrefi. Di a feni wán peri foe bigi waarde, a ben gowe èn wantewante a ben seri ala san a ben abi èn ben bai en.” Nanga den wortoe disi, Jesus ben sori a kefalek hei waarde foe Gado Kownoekondre (Mateus 13:45, 46). Den sma di sabi a waarde foe a Kownoekondre, nofo tron e tjari bigi persoonlijk ofrandi so taki den kan hori en tranga. Disi de foe si nanga na ondrofenitori disi di kon foe Pingtung County, Taiwan.

Na ini 1991, Masra nanga Misi Lin ben bigin studeri bijbel nanga Jehovah Kotoigi. Di wan kerki tiriman foe a presi drape ben kon sabi dati, dan a ben proeberi foe meki den kon tron memre foe a kerki foe en. Foe di a famiri Lin ben abi wan bisnis pe den ben seri agoe broedoe nanga doksi broedoe na a wowojo foe a presi drape, den ben bosroiti foe aksi a kerki tiriman fa en e prakseri foe a tori. „Ala sani di Gado meki, kan de leki njanjan gi libisma”, a ben piki. Ma na a tra sei, den Kotoigi ben gi den deki-ati foe loekoe san a Wortoe foe Gado abi foe taki. Den ben kon leri taki Jehovah Gado e si broedoe leki wan santa sani, bika „a libi foe wan kriatoeroe, na en broedoe” (Lefitikus 17:10, 11, The New English Bible). Foe dati ede, troe kresten moesoe „tan farawe . . . foe broedoe” (Tori foe den Apostel 15:20). Leki wan bakapisi foe na ondrosoekoe di den ben e ondrosoekoe a tori disi na ini den Boekoe foe bijbel, a famiri Lin ben bosroiti foe stòp foe e seri broedoe, ala di a ben de a moro prenspari sani foe pe den ben kisi den moni. Ma na ini wan sjatoe pisi ten den ben kisi wan moro bigi tesi srefi.

Bifo a famiri Lin ben leri sabi a waarheid, den ben prani 1300 pinangnoto palmbon na tapoe a pisi gron foe den. Ala di a ben sa teki feifi jari bifo den bon ben sa boen foe meki moni, te den ben bigi nofo kaba, a famiri Lin ben kan froewakti foe meki 77.000 Amerkan dala na ini wan jari. Ala di a ten foe doe a fosi kotiwroko ben kon moro krosibei, a famiri Lin ben moesoe teki wan prenspari bosroiti. Foe a studie foe bijbel den ben leri taki kresten moesoe krin densrefi „foe ibri dotifasi foe skin nanga jeje”, foe di den no moesoe abi den doti gwenti dati noso foe horibaka gi dati, soleki foe smoko tabaka, gebroiki drug, èn kaw na tapoe pinangnoto (2 Korentesma 7:1). San den ben sa doe?

Na ondro a druk foe wan konsensi di ben fon en, Masra Lin ben bosroiti foe tapoe nanga a studie foe en. Na a srefi ten, Misi Lin ben seri den pinangnoto foe wan toe foe den moro owroe palmbon di den ben abi èn ben meki wan wini foe moro leki 3000 Amerkan dala. Disi ben de nomo wan tesi foe san den ben sa kisi te den ben tan hori den bon foe den. Ma a konsensi foe Masra Lin ben tan naki en.

A ben feti nanga na afersi teleki wan dei a ben aksi den Kotoigi foe a kontren drape foe fala den pinangnoto palmbon gi en. Den Kotoigi ben froeklari taki na en moesoe teki a bosroiti; foe dati ede, a ben moesoe „tjari en eigi lai” èn moesoe fala den bon ensrefi (Galasiasma 6:4, 5). Den ben gi en deki-ati foe memre a pramisi na 1 Korentesma 10:13, di e taki: „No wan tesi ben kon na oenoe tapoe boiti di ala sma e miti. Ma Gado de getrow, èn a no sa gi pasi dati oenoe kisi tesi pasa a sani di oenoe kan tjari, ma nanga a tesi a sa opo a pasi toe foe komoto so taki oenoe man froedrage en.” Den Kotoigi ben taki-go-taki-kon nanga en toe, taki: „Efoe wi fala den bon foe joe gi joe, a ben sa kan taki joe sa sari foe dati èn ben sa gi wi a fowtoe taki joe lasi den.” Wan sjatoe pisiten na baka, a babari foe wan ketisa ben wiki Misi Lin. En masra nanga den pikin ben e fala den pinangnoto palmbon!

Masra Lin ben kon si taki Jehovah e hori ensrefi na a pramisi foe En. A ben feni wroko di ben gi en wan krin konsensi, èn dati ben meki a ben man tron wan prèiseman foe Jehovah. A ben teki dopoe na wan kring-konmakandra foe Jehovah Kotoigi na ini april 1996.

Ija, te joe loekoe en boen, Masra Lin „ben seri ala san a ben abi” èn ben bai wan „peri foe bigi waarde”. Now a abi a kefalek bigi grani foe abi wan persoonlijk matifasi nanga Jehovah Gado èn foe dini den Kownoekondre afersi foe En.