Den ben tanapoe kánkan ala di den Nazi ben froefolgoe den
A SOIFRI RETIFASI foe Jehovah Kotoigi di den ben sori sondro frede na ini Nazi Doisrikondre, de aparti srefisrefi foe a sei di den kerki foe krestenhèit ben teki. Disi na san wan profesor foe historia, John Weiss, e taki na ini en boekoe Ideology of Death. A e skrifi:
„Na ini 1934 na evangelisch kerki ben wani nomonomo taki a ’Luther Kerki ben moesoe ontfanga’ den Nazi, èn den ben taigi ’a Masra Gado’ tangi taki a gi den Doisri wan ’santa èn bigi masra di de foe froetrow’. . . . Wan Protestant biskopoe ben skrifi den kerki tiriman foe en: ’Gado seni [Hitler] kon gi wi.’” Weiss e taki moro fara: „A Doisri Methodist kerki . . . ben agri nanga Biskopoe Dibelius taki Hitler ben froeloesoe Doisrikondre foe wan Bolsjewistis Revo di ben de heri krosibei foe kon, taki a ben tjari vrede nanga rostoe kon . . . A Mormoon kerki ben taigi den memre foe den taki te den ben sa gens Hitler, dan dati ben sa wani taki dati den ben pasa a wet foe den Mormoon.” Èn a e taki moro fara: „Den ben taigi den Katoliksma taki a ben de wan santa plekti foe gi jesi na a njoen tirimakti, wan plekti di noiti den ben drai baka gi, srefi baka di den kerki tiriman ben kon sabi den kefalek takroe sani di ben pasa na ini Owstoe-Europa.”
Ma fa a ben de nanga Jehovah Kotoigi? Profesor Weiss e sori taki „leki wan groepoe, soso den Jehovah Kotoigi ben kakafoetoe teige den Nazi”. Doesoendoesoen foe den ben poti na strafoe-oso, na so profesor Weiss e taki moro fara, „tokoe ibri Kotoigi di den ben seni go na wan strafoeman kampoe, ben kan kon fri te a ben skrifi en nen nomo na ondro wan papira di e taki dati a e gowe libi en relisi”.
Profesor Weiss e taki foe a soifri retifasi foe Jehovah Kotoigi: „Na eksempre foe den e sori na aparti tranga èn bigi krakti di fosi krestendom ben abi, bifo a ben abi wan hei stroektoeroe, èn na abi di a krestendom ben abi foe doe nanga a libimakandra, ben meki na angri moro tranga foe libi wan libi foe soifri retifasi. Soleki fa wan Protestant pastoor ben skrifi foe den: ’A no den bigi kerki, ma na den sma di trawan ben froeteri ogri-ati lei foe den èn ben tegoe gi den, ben de den fosiwan di ben tanapoe teige na atibron foe a Nazi ogri jeje, èn di ben abi a deki-ati foe kakafoetoe teige sani di ben wani meki den skeki nanga a bribi foe den.’”