Kownoekondre preikiman e froeteri

A krakti di Gado Wortoe abi foe krin sma

VERSLAG e froeteri taki moro foeroe foe den sma di de srafoe foe drug e teki a gwenti foe den baka, na baka te den loesoe foe centrum di e jepi sma foe kon boen baka. Ma Gado Wortoe kan doe sani di den kliniek no man doe foeroetron (Hebrewsma 4:12). Gado Wortoe nanga en jeje jepi foeroe sma foe no de srafoe foe drug moro èn foe doe a rai: „Meki wi krin wisrefi foe ibri dotifasi foe skin nanga jeje, èn meki a santafasi kon de volmaakti ini a frede di wi e frede Gado.” — 2 Korentesma 7:1.

Wan ondrofenitori foe Mianmar e gi wan eksempre foe disi. Wan man di ben feti foeroe jari langa nanga a de di a ben de wan srafoe foe drug, e froeteri: „Mi ben tron wan srafoe foe drug di mi ben de wan tini ete. Foeroetron mi ben proeberi foe kon fri foe en, ma mi no ben man. Foe man tan gebroiki drug, mi ben go foefoeroe. Leki wan bakapisi foe dati, na ini 1988, den ben seni mi go na strafoe-oso gi wán jari.

Na baka di mi ben loesoe foe strafoe-oso, mi ben abi kontakti baka nanga fositen mati. No langa na baka, mi ben bigin nanga a gwenti baka foe gebroiki drug. A fasi disi fa mi ben tjari misrefi èn di ben kan kiri mi, ben meki taki den famiri foe mi ben tapoe ala demakandra di den ben abi nanga mi. Na tapoe foe dati, na oproeroe fasi fa mi ben tjari misrefi ben meki foeroe sma na ini a libimakandra ben kon frede gi mi, èn den toe ben bigin wai pasi gi mi.

Ne wan dei wan sani pasa di ben moesoe pasa — mi ben kisi takroe bakapisi foe di mi ben gebroiki toemoesi foeroe drug. Den ben seni mi go baka na strafoe-oso, èn disi leisi a ben de gi dri jari. Ala di a libi na ini strafoe-oso ben moeilek srefisrefi, tokoe na wan sortoe fasi mi ben man pasa den moeilek ten.

Na baka di mi ben doro oso komoto na strafoe-oso, mi ben aksi mi famiri pardon gi den fowtoe sani di mi ben doe bifo. Na wan boen fasi den ben teki mi baka, ma ete wan leisi den mati ben kori mi foe drai go baka na a fositen fasi fa mi ben tjari misrefi.

Te foe kaba, mi granmama ben rikomanderi wan kerki tiriman foe a kontren taki mi moesoe fisiti wan bijbel skoro. A kerki tiriman ben agri nanga dati. Ma bifo mi ben bigin fisiti a bijbel skoro, mi tanta di de wan foe den Jehovah Kotoigi, ben taki dati efoe mi ben wani leri sabi bijbel troetroe, dan mi ben moesoe studeri nanga den Kotoigi.

Mi ben go na a Kownoekondre zaal èn den ben meki mi leri sabi wan man di ben agri foe studeri bijbel nanga mi. Foeroe sma di ben de drape ben taki mi odi na wan waran fasi èn dati ben meki mi firi taki den ben prisiri foe abi mi drape.

Na baka di mi ben bigin studeri bijbel èn ben fisiti den kresten konmakandra, na angri di mi ben firi foe gebroiki drug ben meki presi gi wan angri di mi ben kisi foe kon krosibei na Gado. Wán jari na baka, mi ben meki go na fesi na so wan fasi taki mi ben kan gi mi libi abra na Jehovah Gado, èn mi ben teki dopoe na watra leki simbôl foe a gi di mi ben gi misrefi abra na Gado.

No so langa pasa, di mi ben e go oso foe oso, mi ben miti wan foe den fositen drug kompe foe mi. A no ben man froestan a toemoesi aparti fasi fa mi ben kenki. Disi ben gi mi na okasi foe gi kotoigi, èn mi ben man taki nanga en foe a Kownoekondre howpoe.

Now fosi mi feni wan troetroe marki na ini mi libi èn san a libi wani taki. Tangi foe a jepi foe Gado èn foe a rai foe en Wortoe, taki mi man jepi tra sma now foe poeroe a gwenti di den abi foe gebroiki drug di e lagi den na moreel sei.”