Wan lampoe foe tjari joe na tapoe a pasi foe a libi

„MI SABI heri boen, o Jehovah, taki a no de na a sma foe grontapoe foe a bepaal en pasi. A no de na wan man di e waka srefi foe bepaal pe foe poti en foetoe na pasi” (Jeremia 10:23). Nanga den wortoe disi a profeiti Jeremia ben sori taki sondro jepi, libisma no man tiri a pasi foe a libi nanga boen bakapisi. Pe a jepi disi de foe feni? A psalm singiman e piki na ini a begi foe en gi Jehovah Gado: „Joe wortoe na wan lampoe gi mi foetoe, èn wan leti na tapoe mi pasi.” — Psalm 119:105.

Den sma di e bigin studeri Gado Wortoe, a Santa Bijbel, èn e doe san a e taki, sa de leki wan sma di e bigin nanga wan rèis froekoe mamanten. Na ini a bigin, a no man si foeroe bika a doengroe ete. Ma te a son e bigin opo, a e si moro nanga moro. Te foe kaba, a son e skèin leti na tapoe en ede. A e si ala sani krinkrin. So wan agersitori e memre wi foe wan odo na ini bijbel: „A pasi foe den regtfardikiwan de leki a brenki leti di e kon krin moro nanga moro, te leki a dei poti kon steifi.” — Odo 4:18.

Fa a de nanga den wan di e weigri foe teki a tiri foe Gado? Bijbel e taki: „A pasi foe den godelowsoewan de leki a doengroe; den no sabi na san den e tan naki den foetoe fadon” (Odo 4:19). Ija, den godelowsoewan de leki wan man di e naki en foetoe fadon na ini a doengroe. Srefi den so-kari wini foe den na ini den moro boen situwâsi, de gi wan sjatoe pisi ten nomo, bika „no wan koni, no wan koni foe si sani krin, no wan rai no de teige Jehovah”. — Odo 21:30.

Foe dati ede, waka na baka a tiri foe Gado Wortoe, bijbel. Efoe joe e doe dati, dan joe sa si taki den wortoe na Odo 3:5, 6 de troe: „Froetrow tapoe Jehovah nanga joe heri ati èn no froetrow tapoe joe eigi froestan. Poti prakseri na tapoe en na ini ala joe pasi, èn ensrefi sa meki joe pasi kon reti.”