Hari „dipi watra” kon na tapoe

WAN ODO na ini bijbel e taki: „Rai na ini na ati foe wan man de leki dipi watra, ma a man di abi a koni foe si sani krin, na a wan di sa hari en kon na tapoe” (Odo 20:5). Na ini bijbel ten, a ben de moro tranga foe kisi watra leki fa a de na ini foeroe kondre na ini a ten disi. Di Jesus ben taki nanga a Samaria oema, dan na oema ben e hari watra kon na tapoe foe a Jakob-fonten, wan peti di ben de so wan 23 meter dipi! — Johanes 4:5-15.

Soleki fa Odo 20:5 e sori, dan a koni foe man si sani krin di de fanowdoe foe tjari den dipi prakseri nanga firi kon na doro di kibri dipi na ini na ati foe wan sma, de leki a moeiti di de fanowdoe foe hari watra foe wan peti. Disi de so na ini foeroe kontren foe a libi. Foe eksempre, kande joe sabi sma di foeroe jari langa kisi kefalek foeroe sabi nanga ondrofeni. Efoe den sma disi no abi a gwenti foe gi rai na sma sondro taki den aksi foe dati, dan kande joe moesoe hari den kon na tapoe. Te joe e sori belangstelling, e poti aksi gi a sma, èn na wan koni fasi e go moro dipi ini a tori, dan joe sa, foe taki en so, saka joe emre go na ini wan dipi peti foe koni.

A rai foe Odo 20:5 kan gebroiki toe na ini na osofamiri. Foeroetron wi e jere den wefi e taki: „Mi masra no e froeteri mi fa a e denki!” Wan masra ben sa kan taki: „Mi wefi no e taki nanga mi moro!” Na ini den sortoe situwâsi disi, dan a koni foe man si sani krin de fanowdoe foe hari den prakseri kon na tapoe di de dipi na ini na ati foe wan masra noso wan wefi. Aksi di den poti nanga takt (Joe ben abi wan moeilek dei? San ben pasa? Fa mi kan jepi joe?), foeroetron kan meki den bigin nanga wan dipi takimakandra. Te wi e sori so wan koni foe si sani krin, dan dati sa meki a trowbanti kon tranga, èn a masra nanga a wefi sa kisi wini foe dati.