Neti di sma no ben man sribi, ben tjari wini kon
SREFI kownoe abi neti di den no man sribi. Ahasveros, wan makti tiriman foe Persia na ini a di foe feifi jarihondro b.G.T., ben abi so wan neti. Kande foe di a ben feni taki a no ben poti someni prakseri na tapoe wan wroko di a ben moesoe doe, dan a ben meki wan sma leisi a boekoe gi en pe den afersi foe kownoe-oso ben skrifi na ini. A ben kon sabi taki wan getrow foetoeboi, Mordekai, ben sorgoe taki wan takroe plan di sma ben meki foe kiri en, no ben go doro, ma Mordekai no ben kisi pai foe disi. Ahasveros ben bosroiti foe poti a sani disi di a ben frigiti kon reti wantewante. A sani di a ben doe ben abi boen bakapisi gi a pipel foe Gado, èn dati e sori taki na Gado ben meki taki kownoe no ben man sribi. — Ester 6:1-10.
A gemeente foe Jehovah Kotoigi na ini a foto Hermanus na a sjorosei foe Zuid-Afrika, abi reide foe memre a pisi disi foe bijbel. Den ben gwenti foe kon makandra na ini wan zaal di den ben joeroe. Foeroe jari langa den ben proeberi foe bai wan pisi gron foe bow den eigi Kownoekondre zaal. Te foe kaba na ini 1991, den Tiriman foe Foto ben pristeri den wan pisi gron di ben boen srefisrefi.
Ma son sma ben gens a seri di den ben wani seri a pisi gron disi gi Jehovah Kotoigi. Baka di den ben draidrai wan toe moen, a gemeente ben kisi foe jere taki wan pisi ten foe dri jari langa gron no ben mag seri gi kerki, èn a pristeri di den ben pristeri den wan pisi gron no ben go doro. Mei 1993, a gemeente ben skrifi baka, èn ben aksi den tiriman foe foto foe loekoe a bosroiti foe den baka. Leki piki, den ben kisi wan brifi nanga wán prakserilin na ini, di ben taki dati a ben de so ete taki gron no ben mag seri gi kerki.
Oktober foe a jari dati, wan foe den tiriman foe a foto no ben man sribi wan neti. Na oema ben gebroiki a ten foe loekoe den sani baka di ben skrifi langa ten kaba, foe wan owroe konmakandra di a groepoe tiriman ben abi, foe si efoe a ben moesoe poti prakseri na tapoe iniwan afersi. A brifi foe Jehovah Kotoigi pe den ben aksi den tiriman foe foto foe loekoe a bosroiti foe den baka, ben hari a prakseri foe na oema. So boen, a ben bosroiti foe poti a tori na tapoe na agenda gi a konmakandra di ben o kon. A ben wani tjari kon na krin taki Jehovah Kotoigi ben aksi foe a pisi gron fosi wan sani ben taki dati gron no ben mag seri gi kerki.
Baka wan pisi ten, a gemeente ben kisi a srefi pisi gron di den sma ben pristeri den na ini 1991! A de na a bigi pasi, èn gemeente memre nanga sma di abi belangstelling kan doro en makriki. Den bow wan moi Kownoekondre zaal, di den ben wij in gi Jehovah 5 oktober 1996.
Ala di a gemeente e sari taki a tiriman foe foto no ben man sribi wan neti, tokoe a tori taki srefi kownoe Ahasveros no ben man sribi wan neti, kan trowstoe en. Èn na ini ala toe kefal a bakapisi ben tjari wini kon. A gemeente na Hermanus e prisiri troetroe foe di den abi den eigi Kownoekondre zaal, wan presi gi a soifri anbegi, èn gi theokrasia leri na ini a pôpi foto disi na sjorosei. — Hebrewsma 10:24, 25.