Kownoekondre preikiman e froeteri

Jongoewan e prèise Gado ini a Demokrasia Republiek Kongo

FOEROE hondro jari pasa, a psalm singiman ben gi jongoewan a switi kari foe moksi densrefi ini a prèise di den e prèise a Kownoe foe ten di no abi kaba: „Oen jonkoeman nanga oen njoenwenke toe, oen owroe man makandra nanga den boi . . . , prèise a nen foe Jehovah, bika en nen wawan hei srefisrefi” (Psalm 148:12, 13). Den ondrofenitori di e kon now foe a Demokrasia Republiek Kongo, e poti krakti na tapoe a grani disi di no abi en speri.

• A fasi fa Jehovah Kotoigi e tjari densrefi ben meki na eiginari foe na oso foe wan spesroetoe pionier kon denki boen foe wi. Dati meki a ben gi pasi meki den Kotoigi studeri bijbel nanga en oemapikin Fifi di abi feifi jari. Baka di a papa foe Fifi si taki a go na fesi ini a studeri di a ben studeri Mi boekoe nanga bijbel tori,a dan a ben meki Fifi go na den konmakandra na a Kownoekondre zaal. Drape njofi Fifi ben leri den Kownoekondre singi foe a singiboekoe foe den Kotoigi. A ben lobi spesroetoe singi nomroe 2, di nen „Gado pramisi foe wan paradijs.”

Wan dei a papa foe Fifi ben teki a bosroiti foe tjari en go na en kerki. Ala sma ben froewondroe di Fifi ben weigri foe singi den kerki singi. Foe san ede? Bika a ben feni taki den singi di sma ben singi na ini a kerki foe en papa, no ben kroederi nanga den sani di a ben leri foe en studie foe bijbel. Na presi foe dati a ben singi nanga deki-ati a Kownoekondre singi di a ben lobi.

Baka di den kerki fesiman proeberi difrenti leisi foe kenki en prakseri, ma sondro boen bakapisi, dan den ben teki a bosroiti foe poeroe Fifi di abi feifi jari, komoto na a kerki! Awansi den ben handri so takroe nanga Fifi, tokoe en papa ben tan tiri. A ben prisiri taki Fifi ben teki wan fasti bosroiti na ini san a ben bribi. A papa nanga mama foe Fifi wani taki a go doro foe abi demakandra nanga Jehovah Kotoigi.

• Di wan tini boi di nen Lukodi, ben teki a bosroiti foe studeri bijbel nanga Jehovah Kotoigi, dan en papa ben gens en srefisrefi. Na wán okasi, di Lukodi ben e sreka ensrefi foe go na wan konmakandra na a Kownoekondre zaal, dan en papa ben warskow en taki a o kapoe en nanga wan bigi nefi. Na wan tra okasi, Lukodi en papa ben naki en nanga wan tiki èn ben meki wan dipi soro na en baka. Awansi Lukodi ben kisi hebi gens, tokoe a ben tan hori tranga na en bosroiti foe tron wán foe den Kotoigi foe Jehovah. A ben tan go na fesi èn ben teki dopoe. Now a e dini leki wan gewoon pionier.

A bosroiti di en brada ben teki ben naki na ati foe Sona, a moro jongoe sisa foe Lukodi na so wan fasi taki a ben bigin studeri bijbel nanga den Kotoigi foe Jehovah toe. Ma foe tapoe en foe studeri, dan a papa foe den ben seni Sona go na skoro na wan tra dorpoe, pe no wan Kotoigi ben de. Ma tokoe Sona ben meki a tron wan gwenti foe taki nanga trawan foe den sani di a ben leri. A bakapisi ben de taki na oemapikin foe en tante ben kon kisi belangstelling toe.

Di den Kotoigi foe wan krosibei dorpoe ben jere foe a preikiwroko foe Sona, dan den ben go na en èn ben seti sani gi en foe a kan abi wan oso-bijbelstudie doronomo. A ben tan go na fesi èn no langa baka dati, dan neleki en brada, a ben gi ensrefi abra èn ben teki dopoe leki wan Kotoigi foe Jehovah. Boiti dati, nownow na oemapikin foe en tante na wan preikiman di no dopoe ete, èn wan boekoestudie e hori na ini a dorpoe disi.

A moi troetroe èn a e gi kowroe-ati te jongoewan e moksi densrefi ini a prèise di wi e prèise a nen foe Jehovah!

[Foetoewortoe]