Foe san ede joe no de nanga den?

NDJAUKUA ULIMBA abi 73 jari, èn a jari di pasa a ben teki wan waka foe so wan 450 kilometer. A ben waka a heri pasi, èn dati a ben doe na ini 16 dei.

Na owroe man disi ben teki a langa waka disi so taki a ben kan fisiti wan foe den alajari kongres foe Jehovah Kotoigi. Baka a kongres, nanga foeroe prisiri èn nanga foeroe jeje krakti di a ben kisi, a ben waka go baka na oso — ete 16 dei. A ben warti foe doe den moeiti disi? Ija, seiker! Wan toe jari kaba Ndjaukua Ulimba e teki na alajari waka disi.

Na Afrikan man disi ben de wán foe den moro leki 15 miljoen sma na ini moro leki 230 kondre di ben fisiti den kongres foe Jehovah Kotoigi a jari di pasa. A no de foe taki, dati moro foeroe foe den no ben abi foe waka foeroe dei foe go na a kongres. Moro foeroe foe den ben kon nanga wagi, bus, tren, noso nanga opolani. Joe ben de wán foe den?

Na ini 1998, kongres sa hori baka na heri grontapoe, èn moro foeroe foe den sa hori na ini den zomer moen (noso na ini a drei ten). Efoe en gosontoe e gi en na okasi, dan Ndjaukua Ulimba seiker sa waka a srefi langa pasi baka foe man de drape. En nanga foeroe tra miljoen sma sa jere wan praktis programa di e tranga a bribi èn di e gi krakti. Gi ala sma di e fisiti, a kongres sa de wan heimarki na ini a jari. Joe srefi e kisi wan switi kari foe fisiti en. Jehovah Kotoigi na ini joe kontren sa breiti foe taigi joe san na a adres foe a kongres di de krosibei foe joe.