A fasi fa joe e taki, a e djoekoe noso a e dresi?

NA INI den moeilek ten disi, pikinmoro a no de wan sani foe froewondroe taki foeroe sma de di „broko na ati” èn di „masi na ini jeje” (Psalm 34:18). So boen, foe taki en nanga den wortoe foe na apostel Paulus, a de doronomo fanowdoe foe „gi trowstoe na den sili di broko-saka” èn foe „jepi den swakiwan” (1 Tesalonikasma 5:14). Ma san dan efoe wi kompe e hati wi firi noso e doe wan sani di fowtoe serjoesoe? Na ini so wan situwâsi, kande wi ben sa kan firi taki wi abi a reti foe teki a sma skin gi en. Ma a fiti foe de fersektiki. Rai, awansi reide de gi dati, kan doe sma ogri efoe a e gi na wan tranga fasi. Odo 12:18 e taki: „Wan sma de di e taki sondro foe denki, neleki nanga den djoekoe foe wan feti-owroe.”

Foe dati ede, te wi e bigin foe go sori sma tapoe den fowtoe noso foe loesoe wan kesekese, dan a de troetroe prenspari foe hori a di foe toe pisi foe Odo 12:18 na prakseri: „A tongo foe den koniwan de leki dresi.” Aksi joesrefi ala ten: ’Efoe a ben de fanowdoe taki wan sma ben moesoe sori mi tapoe mi fowtoe, fa mi ben sa wani taki a sma ben sa moesoe handri nanga mi?’ Moro foeroe foe wi e handri moro boen tapoe a gi di sma e gi wi deki-ati leki te sma e kroetoe wi. So boen, lobi foe gi prèise. A sani disi nofotron sa meki a sma di doe wan ogri nanga wi, kisi a tranga firi foe go na fesi, èn a sa teki iniwan jepi di sma wani gi en nanga moro tangi.

A de troetroe prenspari foe safoe den wortoe foe wi na ala ten nanga safri-atifasi! Wortoe di e dresi sma sa meki na arkiman firi leki fa a psalm singiman ben firi ensrefi, di ben skrifi: „Efoe a regtfardikiwan ben sa naki mi, a ben sa de wan lobi boen-atifasi; Èn efoe a ben sa piri-ai gi mi, a ben sa de oli na tapoe na ede, San mi ede no ben sa wani weigri.” — Psalm 141:5.