Wan „eksempre foe wánfasi nanga bradafasi”

Dati na fa wan oema ben kari den sani di Jehovah Kotoigi ben doe baka di a ben pina èn ben brokosaka foe a lasi di a ben lasi wan osofamiri memre ini dede. A e froeteri:

„Foe a sei foe mi famiri èn foe mi sei, mi ben sa wani taki tangi na den kotoigi foe na Italia gemeente na Freiburg, Doisrikondre. Mi famiri no de Jehovah Kotoigi, boiti mi brada Antonio nanga en wefi Anna. Langa ten wi ben kroetoe a relisi di Antonio nanga en wefi ben froekisi, ala di ala ten wi ben abi lespeki gi dati.

Ma now, wi kon kenki wi denki. Foe taki en leti, wi ondrofeni wan eksempre foe bradafasi nanga lobi di noiti wi no ben sa froewakti.

A de wan sari taki Anna dede toemoesi froekoe foe wan ongolokoe di ben pasa na strati. Foe di wi e libi na Italia, wi no ben man gi foeroe jepi na emotioneel sei na mi brada Antonio nanga den pikin foe en. Ma den kotoigi brada foe en ben kon foe jepi en. Den ben jepi en nanga a de di den ben de nanga en, nanga den wortoe foe den, a bribi foe den, a jepi di den ben jepi en na skin sei, na moreel sei, èn na ekonomia sei. Foe di misrefi no man kon taigi a gemeente tangi, meki mi ben sa wani taki tangi na den nanga jepi foe oen tijdschrift; mi ben sa wani taki den tangi gi na eksempre foe den foe wánfasi nanga bradafasi di wi no sa frigiti.”

Den switi wortoe di na oema disi ben taki, wi e warderi. Soleki fa na oema ben si, Jehovah Kotoigi abi wan bradafasi na heri grontapoe (1 Petrus 2:17). Den e kweki tranga banti foe lobi na den mindri, foe di den sabi taki lobi „de wan volmaakti banti foe wánfasi” (Kolosesma 3:14). Srefi na ini den moro sari situwâsi, di wi alamala kan kisi foe doe nanga dati, Jehovah Kotoigi e tan krosibei foe Gado nanga en pipel. — Odo 18:24; Preikiman 9:11; Johanes 13:34, 35.