Maria ben dede leki fa sma e dede?

AKROEDERI san skrifi na ini a njoensoe koranti foe a Vaticaan L’Osservatore Romano, dan a katolik leri foe a teki di den teki Maria go na hemel e taki: „A Njoenwenke Sondro Flaka Foe Sondoe, di ben tan fri foe ala flaka foe a fosi sondoe, den ben teki en skin nanga sili go na ini hemel glori, di a libi foe en na grontapoe ben kon na wan kaba.” A leri disi meki taki son katolik theologiaman e taki dati Maria „no dede èn taki a ben komoto foe a libi na grontapoe go wantewante so na hemel glori”, na so a koranti e taki.a

No so langa pasa, paus Johanes Paulus II ben trowe wan tra leti na a tori tapoe. Na a Algemene Audientie na a Vaticaan na tapoe 25 juni 1997, a ben taki: „A Njoen Testamenti no e gi no wan bodoi foe a fasi fa a situwâsi ben de lontoe a dede foe Maria. A taki di noti no taki foe a tori disi e meki sma kisi a prakseri taki a dede foe Maria pasa neleki fa sma e dede, sondro spesroetoe finifini tori di warti foe sma taki foe den.  . . A sori leki den fasi foe denki taki a no dede soleki fa sma e dede no abi no wan gron.”

A sani di paus Johanes Paulus taki drape e sori wan serjoesoe mankeri ini a kerki-leri taki den ben teki bere foe a njoenwenke sondro a ben kisi flaka foe sondoe. Efoe a mama foe Jesus ben „tan fri foe ala doti foe a fosi sondoe”, dan fa Maria ben kan dede foe di a „dede soleki fa sma e dede”, wan sani di de a bakapisi foe sondoe di a sondoe Adam ben gi abra? (Romesma 5:12) A moeilijk problema disi na ini a theologia kon foe di a Katolik Kerki drai a fasi foe si a mama foe Jesus. A no de foe froewondroe taki pratifasi nanga broeja opo kon na ini a Katolik Kerki foe a tori disi.

Ala di bijbel e taki foe Maria leki wan sakafasi, getrow èn opregti sma, a no e taki foe den eigifasi disi leki eigifasi foe wan „teki bere, sondro a kisi foe flaka foe sondoe” (Lukas 1:38; Tori foe den Apostel 1:13, 14). Bijbel e taki gewoon: „Bika den alamala sondoe èn no e doro a glori foe Gado” (Romesma 3:23). Ija, Maria kisi sondoe nanga onvolmaaktifasi neleki ala tra sma foe a libisma famiri, èn no wan enkri boeweisi de taki a dede wan tra fasi leki fa sma e dede. — Teki gersi 1 Johanes 1:8-10.

[Foetoewortoe]