Ala den kerki tiriman e bribi san den e leri trawan?
A MASRA foe na oema dede didjonsrode. A priester foe na oema ben tjari kon na krin taki a masra foe na oema no ben boen nofo foe go langalanga na hemel, ma a masra no ben takroe so toe taki a ben moesoe seni go bron na hèlfaja. So boen, soleki fa a priester e froeteri, dan a masra e tjari strafoe te leki a kon boen nofo foe go na hemel. Na oema e pai a priester so taki a priester kan begi foe a masra kon fri foe a vagevuur moro esi. A weduwe e firi boen nanga disi èn a e firi taki a priester abi a srefi opregti bribi leki en.
Joe denki taki a weduwe disi no sa man froestan a tori moro, efoe a ben kon sabi taki a priester no ben bribi troetroe taki wan sma e kisi strafoe baka a dede? Foeroe sma e broeja te den e kon sabi taki ipi-ipi kerki tiriman no e bribi foeroe foe den sani di densrefi e leri trawan. A National Catholic Reporter, ben taki foe a sani di a ben kari „wan moro bigi problema gi kerki tiriman leki a problema foe seks”, èn a ben taki: „Na mindri moro foeroe foe den kerki tiriman, joe abi nofo di tapoe foe bribi taki Gado de, noso foe bribi a leri foe kisi pai nanga kisi strafoe, noso foe bribi ini na opobaka . . . taki a bribi di den kerki tiriman no e bribi den sani disi, tron wan prenspari sani na ini a denki foe den, pikinso leki smoko di e tapoe ala sani.”
Tra kerki abi wan srefi sortoe moeilek problema. Wan ondrosoekoe foe den domri foe a Kerki foe Ingrisikondre ben tjari kon na krin taki foeroe foe den „no e bribi den fondamenti sani di foeroe sma e bribi foe a kresten bribi soleki a geborte na a njoenwenke, den wondroe foe Jesus nanga a kon di a Mesias o kon gi a di foe toe tron”, na so a Canberra Times foe Australia e skrifi.
Relisi skrifiman George R. Plagenz ben aksi fa wan domri, nanga wan krin konsensi, ben kan leisi wan fondamenti bribi di ensrefi no ben e bribi na ini. Wan domri ben taki dati te a moesoe leisi a fondamenti bribi, dan a e kenki den bigin wortoe nomo: „Mi e bribi.” A ben e taki: „Te mi e bigin leisi a fondamenti leri, dan mi e taki: ’DEN e bribi ini Gado na Almakti Tata . . . ’ ” Plagenz ben kari a sortoe hoigrifasi disi „a moro bigi kroekafasi na ini a kondre”.
Na wan sari, taki foeroe sma no man froestan ala relisi moro, te den e kon sabi taki den kerki tiriman no e bribi den sani di den e leri trawan èn taki den no de opregti. Ma dati a no a wan-enkri sani di e broeja relisi na ini a ten disi. Foeroe sma di e go na kerki, ben e kisi leri taki bijbel na a Wortoe foe Gado. Den ben sa froewondroe efoe den ben o leri taki wan toe foe den sani di kerki e leri langa ten kaba, no de sani di bijbel e leri? Na artikel di e kon sa poti prakseri tapoe wán eksempre.