„Wi katoliksma abi foeroe foe leri foe den”

A SANI disi wan skoromisi foe Bari, Italiakondre ben taki foe Kotoigi foe Jehovah di a ben e gi lès foe a historia foe relisi, na pikin foe hei skoro. A skoromisi ben taigi a klas taki a ben o gebroiki videocassette leki wan studie jepisani. Di wan studenti, di ben nen Roberto èn di ben abi 18 jari ben jere disi, a ben aksi efoe den ben kan taki toe foe a relisi foe en na ini a takimakandra. A ben pristeri a skoromisi a video Jehovah’s Getuigen — De organisatie achter de naam (Jehovah Kotoigi — Na organisâsi baka a nen). A ben teki a videocassette èn a heri klas foe 30 studenti ben si a video. „A wánfasi, na organisâsi, nanga dipi lobi di ben de foeroe na mindri den Kotoigi foe Jehovah ben naki den ati”, na so Roberto e taki. „Den ben froewondroe moro srefi foe kon sabi taki 40 miljoen eksemplaar foe A Waktitoren nanga 36 miljoen eksemplaar foe Ontwaakt! e druk ibri moen.”

„Mi no ben denki taki oenoe ben orga so kefalek”, foeroe foe den kompe studenti foe Roberto ben taki baka di den ben e si a video. Foe den Jehovah Kotoigi a skoromisi ben taigi a klas: „Loekoe fa a bribi foe den e poesoe den foe abi so wan wánfasi èn foe orga so kefalek. Wi leki katoliksma abi foeroe foe leri foe den.” A video nanga a takimakandra na ini a klas di ben kon baka dati, ben doe foeroe foe meki sma froestan Jehovah Kotoigi moro boen.