Joe sa poti prakseri na tapoe a warskow?

TINANEIGI mei 1997 wan bigi draiwinti wai pasa abra a distrikt foe Kitagon, Bangladesj. Na a foto Koks Basar den ben skrifi foe krakti winti di ben e kon krosibei foe 250 kilometer wan joeroe. Na den boitipresi, kampoe di ben meki foe tasi no ben de foe feni moro srefi, ala di den ben libi pikin tokotoko fokanti pe den ben tanapoe wan leisi. Bon nanga telefonpostoe ben roetoe poeroe; trawan ben broko na toe leki den ben de swarfoetiki. Wan edepenti na ini a Bhorar Kagoj koranti ben skrifi dati a bigi draiwinti ben kiri 105 sma.

So wan 36 joeroe na fesi a dienst di e loekoe na weer ben bariwroko foe a pasi di a winti ben o teki kande. Tweifri no de taki foeroe libi ben kibri foe di hondrohondro doesoen sma ben lon go kibri na ini ston kibripe di ben meki foe kibri gi draiwinti.

Moro leki wán hondro jari now, Jehovah Kotoigi e meki njoensoe bekènti foe wan pori di de krosibei foe kon èn di o de krinkrin moro ogri leki iniwan bigi draiwinti. Bijbel e kari en „a bigi dei foe Jehovah di e gi frede” (Joèl 2:31). Te wi e poti prakseri na tapoe den profeiti boskopoe foe warskow di de foe feni na ini bijbel, dan wi kan lon komoto gi a faja pori dati. — Sefanja 2:2, 3.

Nôno, Jehovah Kotoigi no de profeiti di e taki foe ogri nomo. A boskopoe foe den na wan boskopoe foe howpoe. Den abi a winsi foe jepi sma foe leri foe a Kownoekondre foe Gado, di heri esi o krin a grontapoe foe ala sani di no de regtfardiki. Gado Wortoe, bijbel, e froeteri wi: „Èn ete wan sjatoe pisi ten moro èn a godelowsoewan no sa de moro; èn joe sa loekoe seiker na a presi pe a ben de, èn a no sa de. Ma den safri-atisma srefi sa abi grontapoe leki a goedoe foe den, en den sa feni troetroe switi prisiri na ini vrede pasa marki.” — Psalm 37:10, 11.

[Sma di abi a reti foe a prenki na tapoe bladzijde 32]

WHO/League of Red Cross