„Kweki wan boi”

FOE doe djariwroko nanga boen bakapisi, dan a de fanowdoe foe doe moro leki nomo foe panja wan toe siri na gron èn dan kon na baka wan toe moen foe doe a kotiwroko. Foeroe tranga wroko de fanowdoe foe sreka a doti, sai den siri, èn foe watra èn sorgoe den prani so taki den kan gro kon bigi.

A wroko disi e sori heri boen fa Odo 22:6 troe, di e taki: „Kweki wan boi akroederi a pasi gi en; srefi te a e kon owroe, a no sa komoto na a pasi.” Ija, a leri di papa nanga mama e gi, na wan prenspari penti foe kweki pikin nanga boen bakapisi.

Ma na ini a grontapoe na ini a ten disi di e gi toemoesi foeroe primisi gi foeroe sani, foeroe papa nanga mama no e gi jesi na a rai disi. Te den e handri akroederi a disiten koni taki pikin-nengre moesoe leri foe loesoe den problema densrefi, dan nofotron den e libi den pikin meki den sorgoe gi densrefi. So wan fasi foe handri e meki taki den jongoewan de ini kefar foe a takroe krakti di sma di no e libi akroederi moreel wet nanga boen gwenti, kan abi na den tapoe. — Odo 13:20.

A ben sa moro boen srefisrefi te papa nanga mama e poti kresten gronprakseri na ini den pikin foe den nanga jepi foe a leri foe Gado, froekoe kaba! O froekoe? „Foe sensi pikin-nengreten” na apostel Paulus e taki. Na so a ben de nanga a jongoeman Timoteus. En mama, Eunice, nanga en granmama Lois ben poti „den santa boekoe” na ini Timoteus so taki a ben „leri” èn ben ’boeweigi foe bribi’. Nanga sortoe bakapisi? So wan leri ben plèi wan prenspari ròl foe meki en „koni foe kisi froeloesoe”. — 2 Timoteus 1:5; 3:14, 15.

Na so a de toe na ini a ten disi, papa nanga mama di ’no tapoe foe doe san boen’ sa koti heri boen winimarki efoe den „no e kon weri” (Galasiasma 6:9). A koni kownoe Salomo e taki: „Sondro misi, a papa foe wan regtfardikiwan sa prisiri.” — Odo 23:24.