Kownoekondre preikiman e froeteri
Preiki ’na ini boen ten èn na ini moeilek ten’
DI ORLOKOE ben priti pasa a kondre foe Bosnia nanga Herzegovina, doesoendoesoen sma ben ondrofeni kefalek moeilek problema. Na a ten dati di ben de wan tesi, Kotoigi foe Jehovah ben doe ibri moeiti foe gi den sma deki-ati nanga howpoe. Disi na wan toe pisi foe wan brifi di wan Kotoigi di ben dini wan pisi ten na ini Sarajevo ben skrifi.
„A libi tranga djaso, ma sma e arki a waarheid foe bijbel srefisrefi. Den Kotoigi djaso na wan kefalek boen eksempre leki sma di e horidoro. Den no abi foeroe sani na materia sei, ma den abi wan kefalek boen jeje. Pikinmoro ala den jongoewan na ini a gemeente de na ini a foeroeten diniwroko. Den njoen preikiman e kisi deki-ati foe a faja di den abi, èn a de wan gewoon sani te den e wroko 60 joeroe noso moro joeroe na ini a diniwroko, leti na ini a fosi moen kaba te den de na ini a diniwroko.
Boiti taki wi e preiki oso foe oso, wi proeberi difrenti tra fasi foe miti sma. Foe eksempre, wi ben abi boen bakapisi di wi prati bijbel poeblikâsi na den foeroe beripe na ini a foto.
Wi ben gi kotoigi toe na ini ati-oso. Na ini a Cardiologie Afdeling foe a Sarajevo ati-oso, na edeman datra ben teki na Ontwaakt! foe 8 december 1996, di ben abi a thema na tapoe a kafti ’Hartaanval — Wat valt eraan te doen?’ (Hartaanval — San wi kan doe?) A ben aksi moro eksemplaar so taki a ben kan gi den tra datra toe. Den Kotoigi ben kisi primisi toe foe fisiti ala den sikisma na tapoe en afdeling. Na so fasi, na ini pikinmoro wán joeroe, ala nanga ala moro leki 100 tijdschrift ben prati. Foeroe sikisma ben taki dati a ben de a fosi leisi taki wan sma ben fisiti den na ini na ati-oso foe gi den deki-ati nanga howpoe.
Na wan tra okasi den ben fisiti a Pikin-nengre Afdeling nanga tijdschrift artikel di boen gi pikin-nengre. Na edeman datra ben teki wan toe eksemplaar toe foe Mi boekoe nanga bijbel tori gi a leisi kamra. Now den mama di e fisiti den pikin foe den na ini na ati-oso e leisi bijbel tori gi den ibri dei. Sani seti toe foe fisiti a datra disi na en oso.
Na ini Sarajevo doesoendoesoen NAVO [Noordatlantische Verdragsorganisatie] sroedati foe difrenti kondre de. Den kisi wan finifini kotoigi toe. Son tron wi ben go na ibri pantser wagi èn e gebroiki a brochure Goed nieuws voor alle natiën makandra nanga Waktitoren nanga Ontwaakt! tijdschrift na ini difrenti tongo. Wi ben prati moro leki 200 tijdschrift na den tanpresi foe sroedati foe Italiakondre. A ben froewondroe wi taki foeroe sroedati foe Italiakondre ben taki dati noiti bifo den ben taki bifo nanga Kotoigi foe Jehovah. We, wi ben miti den na ini Sarajevo.
Wan dei wan pantser wagi ben tanapoe na sei a pasi. Mi ben naki nanga mi prasoro na a wagi, èn wan sroedati ben kon na doro. Mi ben pristeri en wan Waktitoren di abi a thema na tapoe a kafti ’Boskopoeman foe vrede — Soema na den?’ A sroedati ben loekoe mi èn ben aksi: ’Joe a no wan Kotoigi foe Jehovah, a no so?’ Baka di a ben jere taki a de so, dan a ben piki: ’Mi no man bribi en, oen de djaso toe! Wan presi de na grontapoe pe Kotoigi no de?’”
Na apostel Paulus ben gi a froemane: „Preiki a wortoe, doe en leki wan sani di de toemoesi prenspari na ini boen ten, na ini moeilek ten” (2 Timoteus 4:2). Leki den kompe bribiman foe den na heri grontapoe, Kotoigi foe Jehovah na ini Sarajevo e doe dati, srefi na ibri bedi èn na ibri pantser wagi!