Den tiriman e prèise den Kotoigi

NA ini Cádiz, Spanjorokondre, wan foto di abi wan selanpresi di didon so wan 500 kilometer na a zuidwestsei foe Madrid, a komsarsi Doña Teófila Martínez ben gi den Jehovah Kotoigi wan plaquette (a sori na tapoesei). A ben skrifi na tapoe: „A komsarsi kantoro foe Cádiz e gi den Jehovah Kotoigi, leki warderi gi a wroko di den ben wroko èn den moeiti di den ben doe gi a boen foe a foto disi.” San den Kotoigi ben doe taki den kisi a grani disi?

Den ben gi a grani disi na den Kotoigi bika den ben erken a wroko di den Kotoigi ben doe foe meki wan pisi foe a stadion foe a foto kon moro boen. Na ini foeroe weekend, hondrohondro Kotoigi ben gi densrefi foe jepi meki den ondrosei koemakoisi foe a Carranza foetoebal stadion kon moro boen. Now ala sma di e gebroiki a stadion abi wini foe den peipi, watrasistema, nanga a gron di den ben meki.

Wan pisi ten kaba den Jehovah Kotoigi abi wan boen matifasi nanga a foto Cádiz. Ibri jari a komsarsi kantoro e doe a boen foe gi den Kotoigi a Carranza Stadion foe hori den alajari distriktkongres. Foe dati ede den Kotoigi e prisiri foe doe san den man foe jepi meki a stadion de na ini wan boen kondisi.

Ma boiti a wroko di den Jehovah Kotoigi e wroko wawan leisi na skinfasi, den e fisiti den birti foe a foto doronomo foe jepi a poebliki na wan tra fasi. Den e meki a „boen njoensoe” foe Gado Kownoekondre bekènti. A no de foe taki, dati den no e doe a poebliki diniwroko foe kisi prèise foe libisma. Den e doe en bika den e gi jesi na a komando foe Jesus foe preiki a „boen njoensoe foe a kownoekondre” èn foe „meki disipel foe sma foe ala nâsi” (Mateus 24:14; 28:19). Na a fasi disi den Jehovah Kotoigi e howpoe foe dini a libimakandra te den e leri sma foe waka „a pasi foe regtfardikifasi”. — Odo 12:28.