Kownukondre Preikiman E Fruteri

„Ala Sani Man na Gado”

Den wortu disi di de na tapusei èn di de fu feni na ini Mateus 19:26, ben sori fu de tru gi wan yungu uma na ini Venezuela. Baka di a ben leri fu frutrow doronomo na tapu Yehovah, a ben man wini wan seryusu problema. A e fruteri:

„Mi granmama ben de wan tumusi bun sma èn ben abi lobi-ati. A ben de wan sari taki a dede di mi ben abi 16 yari nomo. A dede fu en ben hebi srefisrefi gi mi. Mi ben kon bruya na frustan sei èn mi no ben wani komoto na oso srefi fu go tapu a prasi. Te fu kaba mi ben kon tron wan sma di pikinmoro no ben abi no wan kontakti nanga tra sma.

Mi no ben e go na skoro èn mi no ben abi wan wroko tu. Mi ben tan na ini mi kamra nomo. Fu di mi ben de wawan èn no ben abi no wan mati, meki mi ben kisi wan hebi depressie. Mi ben e firi leki mi no warti notinoti èn ben wani dede èn ben wani kiri misrefi. Mi ben e tan aksi misrefi: ’Fu san ede mi de na libi?’

Mi mama ben lobi e kisi den Waktitoren nanga Ontwaakt! tijdschrift fu wan yongu Kotoigi di ben nen Gisela. Wan dei mi mama ben si Gisela di a ben e waka pasa na oso fu wi èn a ben aksi en efu a ben kan yepi mi. Gisela ben agri fu pruberi, ma mi ben weigri fu si en. A sani disi no ben tapu Gisela. A ben skrifi mi wan brifi èn ben fruteri mi taki a ben wani de mi mati èn taki wan sma di ben moro prenspari leki en, ben wani de mi mati tu. A sma dati, a ben taki, ben de Yehovah Gado.

A sani disi ben naki mi ati, èn mi ben skrifi en baka. Dri mun langa wi ben e skrifi makandra. Te fu kaba mi ben kisi a deki-ati fu miti nanga Gisela, baka di a gi mi furu tranga. Na a fosi leisi di wi ben miti makandra, Gisela ben studeri Bijbel nanga mi èn ben gebroiki a buku Joe kan libi foe têgo na ini wan paradijs na grontapoe. Baka a studie, a ben gi mi wan kari fu kon na wan konmakandra na a Kownukondre zaal di ben de na ini a birti. A sani disi ben kon onfruwakti gi mi. Fo yari langa mi no ben komoto na oso èn na idea taki mi ben o de na strati ben e meki mi frede.

Gisela ben abi furu pasensi nanga mi. A ben gi mi a dyaranti taki mi no ben abi fu frede noti èn taki a ben sa go nanga mi na a konmakandra. Te fu kaba, mi ben agri nanga dati. Di wi ben doro na a Kownukondre zaal dan mi ben e bigin beifi èn e broko sweti. Mi no ben man taki no wan sma odi. Toku mi ben agri fu tan go na den konmakandra, èn Gisela ben e kon teki mi ibri wiki na wan getrow fasi.

Fu yepi mi fu wini a senwe di mi ben e senwe, dan Gisela ben e tyari mi go bun fruku na den konmakandra. Wi ben e tanapu na a doro èn ben e gi ibriwan sma odi te den ben e kon. Na a fasi dati mi ben e si soso wán noso tu sma na a srefi ten, na presi fu wan heri grupu na wán momenti. Te mi ben firi taki mi no ben man du dati moro, dan Gisela ben e taigi mi san skrifi na Mateus 19:26: ’Na libisma disi no man, ma na Gado ala sani man.’

Ala di a no ben makriki, te fu kaba mi ben man go na wan moro bigi demakandra srefi fu sma, na wan kring konmakandra. ¡Dati ben de wan bigi stap gi mi! Na ini september 1995, mi ben teki a deki-ati fu taki nanga den owruman fu go na ini na oso-fu-oso diniwroko. Siksi mun baka dati, na ini april 1996, mi ben simbôliseer a gi di mi ben gi misrefi abra na Yehovah, di mi ben teki dopu na ini watra.

Di wan sma ben aksi mi no so langa pasa fa mi ben kisi a deki-ati fu du disi, mi ben piki: ’Na angri fu mi fu plisi Yehovah bigi moro a frede fu mi.’ Ala di son tron mi de depressief ete, toku a prisiri fu mi e kon moro bigi fu di mi e dini leki wan gewoon pionier. Te mi e prakseri fu a tori baka, dan mi musu agri nanga Gisela. Now mi abi wan Mati di abi belangstelling gi mi èn di e ’gi mi krakti’.”—Filipisma 4:13.

[Prenki na tapu bladzijde 8]

„Na angri fu mi fu plisi Yehovah bigi moro a frede fu mi”