Tan Hori wan Bun Nen

TE WI e ondrosuku wan moi skedrei finifini dan dati kan gi wi furu prisiri. Te wi e ondrosuku en moro fini, dan wi sa si fa wan artiest ben gebroiki wan kwasi hondrohondro leisi fu poti difrenti kloru na wan pisi krosi pe a e ferfi a skedrei na tapu.

Na wan srefi sortu fasi wan sma e meki wan bun nen, no nanga wán bradi strepi fu wan kwasi nomo, fu en taki so, ma nanga den furu pikin sani di a du na ini wan heri pisi ten. Iya, safrisafri wi e meki wi nen nanga yepi fu den sani di wi e du.

Na a tra sei, wán kwasi di no gebroiki bun, kan meki wan skedrei lasi waarde. Na so a de tu nanga a nen fu wi. A koni Kownu Salomo ben taki: „Na donfasi fu wan sma fu grontapu di e bruya en pasi” (Odo 19:3). Wan pikin don sani nomo de fanowdu — kande wan faya atibron pe wan sma feti, a dringi fu sopi pasa marki, noso a du di wan sma e du wan sani di no fiti na seks sei — fu pori wan bun nen (Odo 6:32; 14:17; 20:1). O prenspari a de fu dati ede, taki wi e meki muiti fu kisi wan bun nen èn taki wi e wroko fayafaya fu tan hori dati.—Teki gersi Openbaring 3:5.