Rai Fa fu Teki Bun Kompe

YONGUSMA e go na den speri fu den na presi fu go na den papa nanga mama fu den, fu aksi den rai ini a tori fu krosi nanga poku, na so wan nyunsu na ini Reader’s Digest e taki. Fu dati ede a prenspari taki papa nanga mama sabi suma na den kompe fu den pikin fu den èn pe den abi demakandra.

„Na yu abi a frantiwortu fu ondrosuku”, na so Esmé van Rensburg e taki, a fosi takiman na ini na afdeling fu psychologie na wan universiteit na ini Zuid-Afrika. A e taki moro fara: „A kan taki a pikin fu yu sa atibron na yu tapu, ma den sa kisi densrefi baka.” Baka dati a e gi papa nanga mama den koni rai disi. Den wet musu de sani di den pikin kan frustan èn den musu abi krinkrin gronprakseri di e horibaka gi den; arki a pikin fu yu; no handri tumusi faya, ma tan tiri, èn sabi san yu wani taki. Efu yu pikin abi wan mati kaba di no bun, dan poti prakseri na tapu den takru maniri di a matifasi dati tyari kon, na presi fu taki nomo taki a no mag abi demakandra moro nanga a mati dati.

Langa ten kaba bun rai gi papa nanga mama de fu feni na ini Bijbel, a Wortu fu Gado. Fu eksempre, a e taki: „De esi fu yere, no esi fu taki, no esi fu kisi atibron” (Yakobus 1:19). Den Buku fu Bijbel e gi so srefi a moi rai disi te wi e teki kompe: „A sma di e waka nanga koni sma, sa kon koni, ma a sma di abi fu du nanga den wan sondro frustan, a no sa go bun nanga en” (Odo 13:20). Den eksempre disi e sori a koni di de gi den wan di e leisi Bijbel nanga warderi èn di e du san a e taki, na ini den aladei libi.