„Efu Sowtu Lasi En Krakti”

SMA feti fu en. Den gebroiki en fu gi en na sma ini a presi fu tra sani. Na China fu owruten, soso gowtu ben warti moro en. Iya, langa ten sma si sowtu leki wan kefalek warti gudu. Te na a dei fu tide, sma e taki dati sowtu kan dresi sma èn a kan gebroiki leki wan sani fu kakafutu gi siki, èn na heri grontapu den e gebroiki en fu switi a nyanyan èn fu kibri sani meki den no pori.

Fu di sowtu abi furu bun eigifasi èn sma kan gebroiki en na furu fasi, meki a no musu fruwondru wi taki Bijbel e gebroiki en na wan agersi fasi. A Wet fu Moses, fu eksempre, ben aksi fu sma taki ala sani di den ben òfer na tapu na altari gi Yehovah ben musu kisi sowtu (Lefitikus 2:13). Disi no ben de fu meki den ofrandi tesi moro betre, ma kande fu di sowtu ben agersi a pori di sani no e pori noso e go na baka.

Yesus Krestes ben taigi den bakaman fu en na ini a barinen Bergitaki fu en: „Unu na a sowtu fu grontapu” (Mateus 5:13). Di Yesus ben taki disi dan a ben sori taki a preiki di den ben o preiki a Kownukondre fu Gado gi trawan, ben o man gi den sma di ben o arki den na okasi fu kibri a libi fu den. Iya, den sma di ben o du den sani di Yesus taki, ben o kibri den gi a go di a libimakandra pe den ben libi èn ben e wroko, ben go na baka na moreel sei èn na yeye fasi.—1 Petrus 4:1-3.

Ma Yesus ben go doro nanga a warskow: „Ma efu sowtu lasi en krakti, dan . . . a no bun moro fu gebroiki gi no wan sani, boiti fu trowe en go na dorosei fu sma waka na en tapu.” A Bijbel sabiman Albert Barnes ben taki dati a sowtu di Yesus nanga den apostel fu en ben sabi „no ben soifri, a ben moksi nanga sani fu bon nanga gruntu èn nanga sani fu gron”. So bun, efu sowtu lasi en krakti, dan „furu sani fu gron” ben kan tan abra. „A”, na so Barnes ben taki, „no ben bun moro fu gebroiki, boiti . . . fu trowe en na tapu pasi noso strati, neleki fa wi e gebroiki pikinpikin ston.”

Kresten di e poti prakseri na a warskow disi musu luku bun taki den e tan gi kotoigi na publiki noso taki den no e go du godelowsu sani baka. Noso den ben sa go na baka na yeye fasi èn den no sa bun moro fu gebroiki, neleki ’sowtu di lasi en krakti’.