Den „Ben Frede a Tru Gado”

DI DEN Israèlsma ben de srafu na Egipti, dan den Hebrew frutfrow Sifra nanga Pua, ben kon na ini wan tumusi muilek situwâsi. Farao ben wani pruberi fu tapu a gro di a pipel fu wan dorosei kondre ben gro so esi, dati meki a ben gi den uma disi a komando: „Te unu e yepi den Hebrew uma fu meki pikin . . . , efu a de wan manpikin, dan unu musu kiri en.”—Exodus 1:15, 16.

Sifra nanga Pua „ben frede a tru Gado”, fu dati ede den ben abi a deki-ati fu „no . . . du san a kownu fu Egipti ben taigi den”. Na presi fu dati, den ben meki den nyofi boi tan na libi, ala di a deki-ati fasi disi ben kan meki den kon ini kefar. Yehovah „ben meki taki a ben go bun nanga den frutfrow”, èn a ben pai den fu den sani di den ben du fu kibri sma libi.—Exodus 1:17-21.

A tori disi e sori krin taki Yehovah e warderi den sma di e dini en. A ben kan si a sani di Sifra nanga Pua ben du soso leki wan fasi fu sori taki den ben lobi libisma, ala di disi ben de wan deki-ati sani. ¡Bika no wan uma di abi wan krin frustan ben o kiri beibi! Ma toku a de seiker taki Yehovah ben hori na prakseri taki son sma du kefalek ogri sani fu di den ben frede libisma. A ben sabi taki den frutfrow disi no ben du disi soso fu di den ben abi bun-ati gi libisma, ma so srefi fu di den ben frede Gado èn ben de loyaal na en.

¡Wi kan de nanga tangi trutru taki wi e dini wan Gado di e prakseri den getrow sani di wi e du! A tru taki no wan fu wi kisi tesi tapu a bribi fu wi kande, soleki fa dati ben de nanga Sifra èn nanga Pua. Ma te wi e tanapu kánkan gi sani di bun — efu a de na skoro, na wi wrokope, noso iniwan tra situwâsi — dan Yehovah no e si a loyaal lobi fu wi leki wan sani di e kon fu ensrefi. Na presi fu dati, a „e tron a sma di e pai den wan di e suku en seryusu” (Hebrewsma 11:6). Iya, „Gado no de onregtfardiki, so taki a sa frigiti a wroko fu unu èn a lobi di unu ben sori gi a nen fu en, fu di unu ben dini den santawan èn e tan dini den”.—Hebrewsma 6:10.