Meki Wroko Nanga Fri Ten De ini Balansi

„FRI TEN na wan moi krosi, ma a no dati wawan yu musu weri.” Wan skrifiman di wi no sabi a nen fu en, e sori nanga den wortu disi na wan moi fasi omeni waarde fri ten abi. Ma a e sori taki a musu de ini balansi nanga bun wroko.

A Bijbel skrifiman Salomo, di ben skrifi nanga yepi fu santa yeye, ben taki tu fu a tori disi. A koni kownu disi ben taki fu tu sei fu a tori di wi musu wai pasi gi dati. A fosi sani di a ben taki na: „A don sma e fow en anu èn a e nyan en eigi skin” (Preikiman 4:5). Iya, lesi kan meki wan sma kon pôti. A bakapisi kan de taki a no sa waka bun nanga a gosontu fu a lesi sma, iya, nanga en libi srefi. Na a tra sei yu abi son sma di e skoifi ala sani na wan sei soso fu kan wroko tranga. Salomo ben taki dati a wroko di den e wroko tranga nomonomo, na „fu soso èn a strei di [den] e strei fu kisi a winti”.—Preikiman 4:4.

Salomo ben abi leti fu gi rai taki sani musu de ini balansi: „Wan anu di furu nanga rostu, betre moro tu anu di furu nanga tranga wroko èn a strei fu kisi a winti” (Preikiman 4:6). Wan sma musu „si a bun fu a tranga wroko fu en” — dati wani taki dati wanwan leisi a musu teki a ten fu prisiri fu den sani di a wroko (Preikiman 2:24). Èn tra sani musu de ini a libi tu boiti grontapu wroko wawan. Wi musu gi pikinso fu wi ten na wi osofamiri. Salomo ben sori taki a moro prenspari fruplekti di wi abi no de grontapu wroko, ma a dini di wi e dini Gado (Preikiman 12:13). ¿Yu na wan fu den sma di e si wroko na wan balansi fasi?