Fa Papa Nanga Mama Man Kakafutu gi den Tyalensi fu Kweki Pikin

FU KWEKI pikin na ini a ten disi, spesrutu te den de tini, na wan kefalek bigi tyalensi gi papa nanga mama. The Gazette fu Montreal, Kanada, e fruteri taki a pruberi di den e pruberi gebroiki sopi nanga drugs, kon tron „a markitiki gi tini”. A e sori taki papa nanga mama abi „wan frantwortu fu de na ai gi den kenki di den e si na ini a fasi fa den tini [fu den] e tyari densrefi”.

San papa nanga mama musu suku di kan sori den taki den tini fu den abi den sortu problema disi? Na American Academy of Child and Adolescent Psychiatry e sori taki wan tu fu den warskow di a skin e gi, so srefi warskow na emotioneel sei èn na sociaal sei, na taki doronomo den [tini] weri, den eigifasi fu den e kenki èn den e atibron esi, den e tapu densrefi tumusi langa na ini a sribikamra fu den, den lobi fu meki trobi nanga tra sma, èn den e kisi problema nanga skowtu.

Fa papa nanga mama kan yepi den pikin fu den fu no pruberi den sortu takru sani disi èn fu no ondrofeni den takru bakapisi fu dati? Datra Jeffrey L. Derevensky, fu McGill Universiteit, e denki taki wan bun komunikâsi, èn lespeki gi makandra na ini den yari di wan pikin e gro kon tron wan bigisma, kan meki taki den no sa kisi someni problema baka ten. The Gazette e taki tu taki srefi te den tini wani moro fri, toku den abi „a tiri, a yepi, na orgafasi èn a lobi [fanowdu] di den papa nanga mama e gi”. Den sani disi di den taki, na a srefi sani di wan odo na ini Bijbel e taki: „Kweki wan boi akruderi a pasi gi en; srefi te a e kon owru, a no sa komoto na a pasi” (Odo 22:6). Gado e gi papa nanga mama a rai fu de wan eksempre gi den pikin fu den, fu de wan mati gi den, fu de wan sma di e taki nanga den, èn fu de wan leriman gi den.—Deuteronomium 6:6, 7.