„Fa Wi Kan Wiki den Kerki Gemeente fu Wi?”

NA AKSI dati, di a Fransi Katolik tijdschrift Famille Chrétienne (Kresten Osofamiri) ben poti no so langa pasa, no e fruwondru furu sma. Kardinaal Hume fu Ingrisikondre ben kari den kerki gemeente srefi „kefalek bigi sani di e sribi”. A prakseri ben gi fu seti grupu sma fu den kerki gemeente di e preiki gi tra sma, leki wan fasi fu tapu a dyonko di den e dyonko. „Gebroiki nyun sistema fu preiki gi sma langalanga”, na so wan priester na ini Italiakondre e kari en. Ala di no so langa pasa a paus ben horibaka gi den sortu idea disi, toku a no ala sma e si taki a de fanowdu fu fruteri tra sma fu a bribi fu den.

No so langa pasa Pigi Perini, wan kerki tiriman na ini Milan, ben fisiti Afrika pe wan non ben taigi en: „Mi dya 40 yari kaba, èn noiti mi ben kari a nen fu Yesus, fu no pori na Afrikan kulturu.” A kerki tiriman e taki te fu kaba: „¡Wi no e taki fu Yesus moro, wi no e fruteri sma fu Yesus moro, wi no e preiki na evangelie moro!” Ma gi furu tra sma a preikiwroko na wan prenspari pisi fu den libi èn a de wan fasi fu tan wiki na yeye fasi. Pigi Perini e erken: „Yu e miti tu sma na wowoyo di e taki fu Krestes, noso den e hori wan Bijbel na den ondro-anu, èn yu e taigi yusrefi: ¡Luku, Yehovah Kotoigi!”

Milyunmilyun sma lobi fu taki fu Gado Wortu nanga Yehovah Kotoigi. A de trutru so, taki den Kotoigi sreka sani fu hori Bijbel takimakandra na ini yu eigi birti. Soleki fa a ben de na ini a fosi yarihondro, na so den fayafaya Kresten disi e gi makandra deki-ati fu fruteri tra sma fu a bribi fu den. Den presi pe den e miti (di den e kari Kownukondre zaal) na presi pe switifasi nanga matifasi de. Fu san ede yu no e fisiti wan fu den konmakandra di Yehovah Kotoigi seti, èn luku fa yu kan feti fu no dyonko na yeye fasi?