Te Problema E Kon na Wi Tapu Leki ’Winti Di E Gens Wi’

Te na Evangelie skrifiman Markus e taki san ben pasa trutru nanga den disipel fu Yesus di den ben feti fu koti a Se fu Galilea abra na ini wan boto, dan a e taki dati den ben „du furu muiti fu lo a boto, fu di den winti ben gens den”. Ala di a ben de na syoro ete, Yesus ben si a muilek situwâsi di den ben de na ini, èn na wan wondru fasi a ben waka na tapu se go miti den. Di a ben kren go na ini a boto fu de nanga den, dan a winti ben saka.—Markus 6:48-51.

A srefi Bijbel skrifiman ben taki, dati na wan tra okasi bifo dati, wan „bun bigi winti ben broko lusu”. Di dati pasa, dan Yesus „piri-ai gi a winti . . . , èn a winti ben saka, èn a se ben kon bedari trutru.”—Markus 4:37-39.

Ala di wi na ini a ten disi no abi a grani fu si den sortu wondru sani dati, toku wi kan leri furu fu den. Leki onvolmaakti sma, di e libi na ini wan ten di furu nanga kefar, wi e kisi fu du nanga problema tu (2 Timoteus 3:1-5). Fu taki en leti, sontron wi kan feni taki den broko-ede di wi e kisi fu den tesi di e miti wi, kan kon hebi neleki bun bigi winti. ¡Ma wi kan kisi frulekti! Yesus e gi wi a kari: „Kon na mi, un alamala di e wroko tranga èn di abi hebi lai, èn mi sa gi unu kowru ati.”—Mateus 11:28.

Te a gersi leki ’wi e kisi fu du nanga winti di e gens wi’, dan ’wi ati kan kon bedari trutru’. Fa dati kan pasa? Fu di wi e frutrow tapu den pramisi fu Yehovah Gado di no e misi noiti.—Teki gersi Yesaya 55:9-11; Filipisma 4:5-7.