Libisma—¿Den De wan Hei Sortu Meti Nomo?
„¿A abi trobi san wi e bribi fu fa a libi bigin?”
Wan umapikin na Brasyonkondre di abi 16 yari ben poti na aksi disi na ini den wortu na fesi, fu a taki fu en fu a tori „Libisma—¿Den De wan Hei Sortu Meti Nomo?” A skoromisi ben gi a studenti disi a kari fu taki nanga a klas fu na aksi dati, baka di a skoromisi ben kisi wan eksemplaar fu na Ontwaakt! fu 22 yuni 1998, di e taki fu a tori dati.
A yongu Kotoigi ben tyari kon na krin o kefalek takru a leri fu na evolutie de, di abi en gron tapu a leri fu a tan di den moro bun wan e tan na libi. Fu eksempre, furu sma e feni dati a leri fu evolutie e meki taki son sma e si feti soso leki wan sani di libisma musu du nomonomo fu a muiti di sma e du muiti fu tan na libi, èn dati ben yepi fu krin a pasi gi Fascisme nanga Nazisme.
A studenti ben sori dati wan bigi difrenti de na mindri sma nanga meti. A ben taki: „Soso libisma kan kweki yeye fasi. Soso libisma e pruberi fu kon sabi san libi wani taki èn san na a marki fu a libi. Soso libisma e broko den ede nanga dede, e broko den ede nanga fa a libi fu den bigin, èn soso den abi na angri fu libi fu têgo. ¡A de prenspari srefisrefi taki wi e teki wi ten fu kon sabi pikinso moro furu fa wi libi bigin!”
A skoromisi ben prèise a bun pristeri. A ben sori taki a yongu tini Kotoigi disi ben abi bun bakapisi fu di a lobi leisi. Den sabi na umapikin na skoro leki wan sma di e leisi den publikâsi fayafaya soleki Ontwaakt! nanga A Waktitoren di abi en gron tapu Bijbel.
Yehovah Kotoigi e broko den ede trutru nanga a krakti di a leri fu evolutie abi tapu den ati nanga frustan fu yongu sma. Fu dati ede, a gemeente pe na umapikin disi e go, ben gi ala den yongu Kotoigi deki-ati fu gi wan eksemplaar fu na Ontwaakt! fu 22 yuni 1998 na den skoromeester, skoromisi nanga den skoromati fu den. So wan 230 tijdschrift ben prati na difrenti skoro na ini a foto. Na edeman fu a Sabidensi Afdeling fu wan skoro ben teki wan abonnement fu kan kisi na Ontwaakt! tijdschrift.
¡Iya, a abi bisi trutru san wi e bribi fa a libi bigin! A yongu sma disi nanga den mati fu en sori taki bribi na ini a Kriaman abi bisi trutru na ini a libi fu den.