A Sani Di A E Misi fu a Foto New York

FU SENSI den yari na mindri 1950 nanga 1959 a bord di yu e si dyaso de krin fu si na wan fu den oso fu den drukkerij fu a Waktitoren Genootschap na ini Brooklyn, New York. A bord e memre sma di e reis fu a wan presi go na a tra presi, den toerist nanga tra sma di e pasa, fu leisi Bijbel ibri dei. A brifi di e kon now èn di wan yongu Kotoigi di de wan umapikin ben seni kon, e sori den bun bakapisi fu a sani di a bord disi e memre sma.

„Mi ben taki nanga wan skoromati fu mi san mi ben wani du te mi ben o klari middelbaar-skoro. Mi ben bigin taki fu Bethel, na edekantoro fu Yehovah Kotoigi, èn a ben kon prisiri srefisrefi. A ben fruteri mi taki en heri libi langa a ben libi na ini New York. Na osofamiri fu en no ben abi furu fu du nanga relisi afersi, ma ibri mamanten te a ben luku go na dorosei a fensre, a ben si wan bord nanga den wortu disi : ’Leisi Gado Wortu, a Santa Bijbel, Ibri Dei.’ So bun ibri dei bifo a ben go na skoro a ben e leisi en Bijbel.

A skoromati ben taki, dati baka di a froisi komoto na New York, a no ben man si den wortu moro di ben e memre en te a e wiki fu leisi en Bijbel èn dati na a sani di a e misi fu a foto New York. ¡Ma fu a bord di de na a Waktitoren oso ede, meki a tron wan gwenti gi en fu leisi Bijbel, èn na so a go doro fu leisi Bijbel ibri dei!”

¡No wan moro betre fasi ben kan de fu bigin a dei leki fu leisi wan pisi fu a Wortu fu Gado! A no abi misi taki te yu e du dati, yu sa kon frustan den wortu fu na apostel Paulus: „Den santa buku . . . kan meki yu kon koni fu kisi frulusu nanga yepi fu a bribi di abi fu du nanga Krestes Yesus.”​—2 Timoteus 3:15-17.