Wan Spesrutu Fesa—¿Yu Sa De Drape?

MORO leki 3500 yari pasa, na wan dei di sma no sa frigiti makriki, Yehovah Gado ben meki ibri osofamiri fu Israèl di ben de na ini katibo na Egipti kiri wan pikin skapu noso wan krabita. Den ben musu iti-iti a brudu fu a meti dati na tapu den seipostu fu den doro èn den tapusei doropostu fu den oso fu den. A srefi neti dati, na engel fu Gado ben pasa den oso di ben marki na a fasi disi, ma a ben kiri den fosi gebore manpikin na ini den oso fu ala den Egiptisma. Na a ten dati den Israèlsma ben kon fri. Ala yari den Dyu hori a Paskafesa, na a dei di a sani dati ben pasa.

Wantewante baka di Yesus Krestes ben kaba fu hori a lasti Paskafesa nanga den apostel fu en, dan a ben seti sani gi wan nyanyan di ben sa yepi sma fu memre na ofrandi dede fu en. A ben gi den apostel fu en brede sondro srudeki èn a ben taki: „Teki, nyan. Disi wani taki mi skin.” Baka dati a ben gi den wan beker nanga win èn a ben taki: „Un alamala dringi fu en; bika disi wani taki mi ’brudu fu a frubontu’, di sa kanti trowe fu a bun fu furu sma fu gi pardon fu sondu.” Yesus ben taki tu: „Tan du disi fu memre mi” (Mateus 26:26-28; Lukas 22:19, 20). Na a fasi disi Yesus ben gi den bakaman fu en a komando fu hori a fesa disi fu memre a dede fu en.

A yari disi, a dei di wi e memre a dede fu Yesus, e fadon na tapu dridewroko 19 april baka te son dongo. Yehovah Kotoigi na heri grontapu sa kon makandra na tapu a spesrutu neti disi fu hori a Memrefesa disi soleki fa Yesus ben aksi. Wi prisiri fu gi yu a kari fu hori a fesa makandra nanga wi. Grantangi, aksi Yehovah Kotoigi na a presi pe yu e tan, san na a yoisti ten nanga a yoisti presi pe a konmakandra disi sa hori.