Papa Nanga Mama No E Agri Kwetikweti Nanga a Desko Di wan Skoromeester Ben Desko Sma

Wan skoromeester fu wan lagiskoro na ini Cassano Murge, na Italiakondre, ben gi wan tu fu den studenti fu en sticker fu tyari go na oso. Na tapu den sticker disi, di den ben musu plak na tapu a fesidoro, ben skrifi: „Wi na Katoliksma. Wi e aksi den Kotoigi fu Yehovah fu no naki na a doro disi.”

Wan tu fu den papa nanga mama fu den studenti, no ben agri kwetikweti nanga den sani di a skoromeester du, ala di densrefi no de Yehovah Kotoigi. Soleki fa a nyunsu tijdschrift Muoviti Muoviti e taki, dan den papa nanga mama disi ben fruklari taki ’te sma e gi pikin den sortu boskopu disi, dan dati kan meki taki den e weigri fu arki iniwan sma di no e denki leki fa den e denki noso a kan meki taki den no e bumui nanga wan sma bika a relisi fu a sma „no de a srefi” leki di fu en’. Wan mama di ben skrifi go na a kantoro fu a tijdschrift, ben kari a sticker „a siri fu wan takru wiwiri, a sani di yu e kisi te sma no frustan sani bun èn a tyari di sma e tyari densrefi na wan don fasi”.

Soleki fa a nyunsu disi e sori, dan furu eerlijk sma e si sortu ogri kan kon te sma e du sani di kan meki taki sma e desko trawan. Den eerlijk sma disi, abi lespeki tu gi a Kresten diniwroko di Yehovah Kotoigi e du na Italiakondre èn na heri grontapu. Fu san ede yu no e aksi den Kotoigi fu Yehovah san na ’wan reide fu a howpu di de na ini den’? Den sa prisiri trutru fu taki fu a tori disi nanga yu, èn den sa du dati nanga „bigi lespeki”.—1 Petrus 3:15.