Suma Sa Tyari wan Kaba Kon na a Ogri Di Sma E Du Nanga Tranga?

NA INI september 1999, sma di e teki presi gi trawan ben go na a di fu 54 alayari Algemene Konmakandra. Kofi Annan di de a Sekretarsi-Generaal fu den Verenigde Nâsi, ben gi den sma disi wan switikon. Leki fa The Toronto Star ben skrifi, dan a Sekretarsi-Generaal ben tyalensi fesiman fu grontapu tiriman, di a ben taki: „Gi bun furu sma a no de nofo taki furu kondre e taki nomo dati den e firi sari gi den. San den abi fanowdu na wan trutru pramisi di sma no sa broko. So wan pramisi ben sa yepi den fu tyari wan kaba kon na ogri di sma e du nanga tranga doronomo, èn ben sa yepi den fu bigin meki na ekonomia situwâsi fu a kondre fu den, kon bun.”

Den VN nanga den kondre di de memre fu en kan gi wan „trutru pramisi di sma no sa broko” fu tyari wan kaba kon na a ogri di sma e du nanga tranga? A presidenti fu Amerkankondre, Bill Clinton di ben kari na ini a srefi artikel fu The Toronto Star, ben taki: „Baka di someni sma kiri makandra na ini na yarihondro disi, wi sabi taki a makriki fu taki dati ’disi no o pasa noiti moro’, ma fu meki taki disi no pasa trutru, na wan moro muilek sani.” A ben taki go moro fara: „Fu pramisi sma tumusi furu sani, kan de a srefi ogri-ati sani leki te yu no e teki broko-ede nanga den srefisrefi.”

Moro leki 2500 yari pasa, a profeiti Yeremia ben taki fu a muiti di libisma e meki: „Mi sabi heri bun, o Yehovah, taki a no de na a sma fu grontapu fu a bepaal en pasi. A no de na wan man di e waka srefi fu bepaal pe fu poti en futu na pasi” (Yeremia 10:23). Sortu howpu de dan taki wan kaba sa kon na a ogri di sma e du nanga tranga?

Te wi e leisi Yesaya 60:18, dan Gado ben gi a dyaranti: „Ogri di sma e du nanga tranga no sa de fu yere moro na ini yu kondre, èn a fufuru di [sma] e fufuru nanga tranga noso a broko di sani e broko puru na ini a pisi kontren fu yu kondre.” A profeititori disi ben abi wan fosi kontru, di Gado ben tyari en pipel di ben de na ini katibo, go baka na den eigi kondre. A profeititori abi wan moro bigi kontru di wi kan nyan bun fu dati. Yehovah Gado no e „pramisi tumusi furu sani”. Leki a Moro Heiwan èn leki a Mekiman fu libisma, en na a yoisti sma di kan tyari wan kaba kon na „a ogri di sma e du nanga tranga doronomo”. Na ondro a Kownukondre fu Gado, vrede sa lai. Ogri di sma e du nanga tranga, no sa de noiti moro!—Danièl 2:44.