Fu San Ede Wi Musu Gi Trawan Pardon?
„SABIDENSIMAN bigin nanga wan ondrosukuwroko di sori kaba taki te wi e gi trawan pardon, dan dati kan meki wi firi moro bun na ini wi ati — èn a kan du bun tu gi a gosontu fu unu na skin sei”, na so The Toronto Star fu Kanada e fruteri. Toku Professor Carl Thoresen fu Stanford Universiteit na ini Amerkankondre, na ondrosukuman di e teki fesi ini a Stanford Forgiveness Project, e taki dati „wan tu sma nomo e frustan san a wani taki fu gi trawan pardon èn fa a sani disi e wroko”.
Sma e si trutru pardon leki wan tumusi prenspari pisi fu Krestendom. A verslag fu The Toronto Star e sori taki trutru pardon, na „te yu e frustan taki wan sma du wan sani nanga yu èn baka dati yu no e atibron moro fu a sani di pasa ede, èn te fu kaba e sori sari-ati èn srefi lobi gi a sma di ben du yu wan ogri”. A no de a srefi leki te sma e tapu ai gi sani, e meki leki noti no pasa, e frigiti, noso e taki dati no wan ogri ben du; èn a no wani taki tu taki yu musu poti yusrefi baka na ini wan situwâsi pe sma kan du yu wan hati sani. A verslag e taki dati a moro prenspari sani di de fanowdu fu gi trutru pardon, na te wan sma „no e mandi moro èn te a e tapu fu prakseri takru fu trawan”.
Ondrosukuman e taki dati moro ondrosuku musu du fu kan kon sabi san na den winimarki na skin fasi te wi e gi pardon. Ma den e taki dati na frustan sei winimarki de gi a sma na a fasi fa a e firi. Tra winimarki sa de tu, taki sma no sa kisi „so furu stress, broko-ede, èn den no sa firi brokosaka doronomo”.
Wan tumusi bun reide di wi abi fu gi trawan pardon skrifi na Efeisesma 4:32, èn a tekst disi e taki: „Tron sma di abi switifasi gi makandra, di abi safu sari-atifasi, èn di e gi makandra pardon na wan fri fasi, neleki fa Gado ben gi unu pardon na wan fri fasi nanga yepi fu Krestes.” Te a abi fu du nanga a gi di wi musu gi trawan pardon, èn so srefi nanga tra sani, dan wi e kisi rai fu kon de sma di e waka baka na eksempre fu Gado.—Efeisesma 5:1.
Efu wi e weigri fu gi trawan pardon, ala di wan gron de fu sori sari-ati, dan disi kan pori a matifasi di wisrefi abi nanga Gado. Yehovah e fruwakti fu wi taki wi e gi makandra pardon. Dan wi kan begi taki A sa gi wi pardon.—Mateus 6:14; Markus 11:25, 1 Yohanes 4:11.