A Koni fu Gado​—Fa A De Fu Si?

„SMA e wisiwasi a koni fu a pôtiman, èn den no e arki den wortu fu en.” Nanga den wortu disi, a koni Kownu Salomo ben tyari wan kaba kon na a tori fu wan pôtiman, ma toku wan koni man, di ben kibri wan heri foto fu no kisi pori. Ma a de wan sari sani, taki „no wan sma ben memre a pôtiman dati”.—Preikiman 9:14-16.

Libisma abi a gwenti fu wisiwasi den mofinawan, awansi den pôti sma disi du bun sani. Na so den ben du nanga Yesus. Yesaya ben taki fu en na fesi: „Sma ben wisiwasi en èn den ben wai pasi gi en, wan man di ben musu pina èn di ben musu sabi siki” (Yesaya 53:3). Den ben wisiwasi Yesus soso fu di a no ben abi wan hei posisi leki den prenspari fesiman na ini a ten fu en. Toku a ben abi koni di ben bigi moro leki di fu iniwan sondari. Den sma di ben libi na ini a foto pe Yesus ben tan, no ben wani erken taki a ’manpikin disi fu wan temreman’ ben abi so wan koni èn ben du so krakti wroko. Ma dati ben de wan seryusu fowtu, bika a tori e taki moro fara taki Yesus „no ben du furu krakti wroko drape, fu di den ben mankeri bribi”. Dati ben de wan lasi gi den sma dati trutru!—Mateus 13:54-58.

Meki a de so taki wi no e meki a srefi fowtu. „Koni e regtfardiki ensrefi nanga yepi fu den wroko fu en”, Yesus ben taki. Wi kan si suma e du a wroko fu Gado èn e gi trawan a koni fu hemel, no fu di wi e luku a posisi noso a nen di den abi, ma fu di wi e si den „bun froktu” di den e sori — a bribi fu den makandra nanga den sani di den e du di abi den gron na tapu Bijbel.—Mateus 7:18-20; 11:19.