Wan Sani Di Wi Kan Leri fu wan Botoman
WAN sma kan kon weri srefisrefi te a e seiri en wawan na mindri fu a bigi se. A sma no sa man denki krin moro fu di a weri, èn dati esi-esi kan tyari en go so fara taki a e meki fowtu èn a e teki bosroiti di no bun. Na fu disi ede meki a e erken taki wan se ankra na wan prenspari sani. A e gi wan botoman di weri na okasi fu rostu èn fu kisi krakti baka, sondro taki a e drifi gowe nomo nanga a boto. Na a srefi ten, na ankra e dwengi a boto-ede fu drai go na ini a winti nanga den skwala, èn a e meki a boto tan didon na tapu a watra, so bun leki a kan.
Neleki fa botoman e miti furu kefar na se, na so Kresten doronomo abi fu du nanga den hebi di a grontapu disi e poti na den tapu, èn den e firi taki den abi rostu fanowdu. Fu taki leti, Yesus ben rikomanderi en disipel wan leisi: „Kon, unu wawan, na wan tiri presi èn rostu pikinso” (Markus 6:31). Na ini a ten disi, son sma kande e teki wan tu wiki fakansi noso den e gowe na wan presi nanga den osofamiri na a kaba fu a wiki, fu kan teki rostu. Den pisi ten disi kan meki sma kisi nyun krakti baka. Ma fa wi kan sorgu taki sani e waka bun nanga wi na yeye fasi na ini den ten disi? San kan de leki wi ankra na yeye fasi gi wi fu yepi wi fu no drifi gowe èn fu tan tanapu kánkan?
Na wan lobi-ati fasi Yehovah sorgu fu wan seti gi wi. Dati na en Santa Wortu, a Bijbel. Te wi e leisi en ala dei, dan wi kan tan krosibei fu Yehovah èn noiti no drifi gowe fu en. A rai di de na ini Bijbel kan meki wi tanapu kánkan èn a e meki taki wi man kakafutu gi den tesi fu Satan nanga di fu a grontapu fu en. Te wi e tan leisi a Bijbel doronomo, srefi na ini den pisi ten te wi no e du den sani di wi gwenti fu du ala dei, dan disi kan ankra wi na yeye fasi.—Yosua 1:7, 8; Kolosesma 2:7.
A psalm skrifiman e memre wi taki „koloku fu a sma” di „en prisiri de na ini a wet fu Yehovah, èn na ini en wet a e leisi nanga wan safri sten dei nanga neti” (Psalm 1:1, 2). Te wi e leisi a Wortu fu Gado ala dei, dan dati sa meki taki wi sa de „koloku” fu di trutru wi sa kisi nyun krakti baka, èn wi sa de srekasreka fu tan waka a Kresten pasi fu wi.